Tekur Jón við starfinu af Jóhanni Möller en greint var frá því í síðustu viku að hann hefði verið ráðinn framkvæmdastjóri markaða hjá Arion og myndi jafnframt því taka sæti í framkvæmdastjórn bankans.
Jón starfaði áður hjá Stefni, sem er með um 300 milljarða króna í virkri sjóðastýringu, á tímabilinu 2003 til 2008 og aftur á árunum 2013 til 2017 þegar hann veitti skuldabréfateymi félagsins forstöðu og var jafnframt staðgengill framkvæmdastjóra.
Í tilkynningu segir Jón: „Það er mikið tilhlökkunarefni að ganga aftur til liðs við Stefni og þann öfluga hóp starfsfólks sem þar starfar. Félagið hefur um árabil verið í forystu á sjóðastýringarsviði og er í kjörstöðu til að nýta þau tækifæri sem eru til staðar til frekari vaxtar.“
Sigrún Ragna Ólafsdóttir, stjórnarformaður Stefnis, segir Jón búa yfir afar mikilli reynslu af fjármálamarkaði og þekki Stefni vel og fyrir hvað félagið stendur. „Framundan eru spennandi tímar á þessum vettvangi sem kalla á fagmennsku, þekkingu og frumkvæði,“ segir Sigrún Ragna.
