Gríska goðið orðið stigahæst í sögu Bucks, Dí­sætur DeRozan og Lakers geta ekkert

Stórleikur kvöldsins var án efa leikur Brooklyn Nets og meistara Milwaukee Bucks. Kyrie Irving má nú spila í Brooklyn og heimamenn vilja koma á siglingu inn i úrslitakeppnina. Sömu sögu er að segja af meisturunum sem hafa þó verið nokkuð óstöðugir í síðustu leikjum.

Leikur næturinnar í Barclays Center minnti um margt á leik í úrslitakeppninni en það var ekkert gefið eftir. Heimamenn byrjuðu leikinn betur og leiddu með allt að tíu stigum í öðrum leikhluta. Það er þangað til gríska goðið Giannis Antetokounmpo sagði „hingað og ekki lengra.“

Munurinn kominn niður í aðeins fjögur stig er liðin gengu til búningsherbergja í hálfleik. Síðari hálfleikur var svo háspenna lífshætta. Undir lok þriðja leikhluta tóku gestirnir forystuna en heimamenn náðu aftur tökum á leiknum.

Khris Middleton var sendur í sturtu þegar fimm mínútur voru eftir en hann reif Bruce Brown þá niður sem var í þann mund að koma Brooklyn fimm stigum yfir. Heimamenn voru níu stigum yfir þegar rétt tæplega fjórar mínútur lifðu leiks. 

Bucks gáfust ekki upp og Giannis hafnaði metin í 110-110 þegar 18 sekúndur voru til leiksloka. Þar með var Giannis orðinn stigahæsti leikmaður Milwaukee Bucks frá upphafi. Nets skoruðu ekki í næstu sókn og því var framlengt. 

Háspennan hélt áfram í framlengingunni, þegar tæpar 10 sekúndur voru eftir var brotið á Durant sem var á leiðinni upp í þriggja stiga skot. Durant setti öll þrjú skotin niður og Brooklyn leiddi 119-118 með 8,7 sekúndur eftir á klukkunni.

Giannis fékk boltann, keyrði inn að vörn Brooklyn og á endanum var brotið á honum. Hann skoraði úr báðum vítaskotum sínum og tryggði Bucks magnaðan 120-119 sigur. Alls skoraði Giannis 44 stig í leiknum ásamt því að taka 14 fráköst og gefa 6 stoðsendingar.

Gríska goðið er nú stigahæsti leikmaður í sögu Milwaukee. Fyrir kvöldið var hann 39 stigum á eftir goðsögninni Kareem Abdul-Jabbar og því var aðeins tímaspursmál hvenær Giannis myndi ná toppsætinu. Hann gerði það með stæl og tryggði Bucks magnaðan sigur í leiðinni. Alls hefur Giannis skorað 14.172 stig í NBA-deildinni.

Hjá Nets var Durant með 26 stig, 11 stoðsendingar og 7 fráköst. Kyrie var með 25 stig, 5 stoðsendingar og 3 fráköst.

Chicago Bulls þurfti framlengingu til að leggja Los Angeles Clippers að velli, lokatölur 135-130. DeMar DeRozan tryggði sigur Nautanna en hann skoraði 50 stig í leiknum ásamt því að gefa 6 stoðsendingar og taka 5 fráköst. Nikola Vučević kom þar á eftir með 22 stig og 14 fráköst. Hjá Clippers skoraði Reggie Jackson 34 stig ásamt því að gefa 7 stoðsendingar.

Utah Jazz vann öruggan sigur á Los Angeles Lakers, lokatölur 122-109. Eins og staðan er í dag er Lakers ekki á leiðinni í umspil fyrir úrslitakeppnina. Liðið var án bæði Anthony Davis og LeBron James í nótt og það sást.

Jazz betri aðilinn frá upphafi til enda og sigurinn hefði getað verið mun stærri. Donovan Mitchell skoraði 29 stig fyrir Jazz ásamt því að gefa 7 stoðsendingar. Rudy Gobert skoraði 25 stig og tók 17 fráköst. Hjá Lakers skoraði Russell Westbrook 24 stig og gaf 7 stoðsendingar. Dwight Howard kom þar á eftir með 21 stig og 12 fráköst.

Trae Young skoraði 30 stig er Atlanta Hawks rúllaði yfir Cleveland Cavaliers, lokatölur 131-107. Þá vann Detroit Pistons óvæntan sigur á Philadelphia 76ers, lokatölur 102-94.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði.