Segir Ingu hræsnara fyrir að vilja banna blóð­mera­hald

„Hún telur sig vera að vernda þessar merar sem eru okkar bústofn og virðist vera nákvæmlega sama þó það þurfi að farga þeim eða jafnvel að þær verði framfærslulausar og jafnvel þyrftu að svelta,“ sagði Sigríður Jónsdóttir, bóndi í Arnarholti í Biskupstungum, í Bítinu á Bylgjunni í morgun. 

Sigríður hefur að undanförnu skrifað pistla sem birst hafa á Vísi og stílaðir eru á Ingu Sæland, sem lagt hefur fram frumvarp á Alþingi um bann á blóðmerahaldi. Fyrsta bréfið frá Sigríði birtist 21. janúar en það er bréf sem annar blóðmerabóndi hafði sent Ingu persónulega og Inga deilt á Facebook. Sigríður segist hafa vilja birta bréfið opinberlega til að vekja athygli á málstaðnum. 

„Ég var nú sammála hverju einasta orði sem stóð í þessu bréfi, enda er ég kollegi þessa fólk sem skrifar þetta bréf þannig að ég ákvað að senda henni það aftur sjálf og gera það opinberlega svo hún hefði ekki dagskrárvaldið yfri skrifum þessa fólks. Það að kalla hana hræsnara og dýraníðing, það kemur fram í þessu bréfi hvers vegna það er gert,“ segir Sigríður. 

Segir frumvarpið til þess fallið að „hafa af fólki lífsviðurværið“

Í bréfinu er Inga sögð hræsnari fyrir það að leggja fram frumvarpið, sem komi einna helst niður á fátækum bændum. 

„Þessi manneskja hefur kynnt sig og sinn flokk með það að aðalmarkmiði að vinna fyrir hagsmunum fátæks fólks og ég veit ekki betur en að við séum nákvæmlega það, við séum fátækt fólk. Svo leggur hún fram frumvarp á þingi með það að markmiði að banna okkur að vinna og hafa af okkur lífsviðurværið,“ segir Sigríður. 

Blóðmerahald hefur verið til mikillar umræðu að undanförnu eftir að þýsku dýraverndunarsamtökin Animal Welfare Foundation birtu myndband, sem tekið var upp hér á landi á blóðmerabýlum. Sigríður gefur ekki mikið fyrir myndbandið og segir höfunda þess hafa ýkt innihald myndefnisins. 

„Þetta myndband er tekið með ólöglegum myndavélum og þessar njósnir á enginn veit hvað mörgum bæjum stóðu yfir örugglega mjög lengi. Myndbandið samanstendur af tveimur til fjórum mínútum af samanklipptu efni. Það sem þessi njósnasamtök höfðu upp úr krafsinu var þetta hráefni, fáeinar mínútur sem þau gátu sett saman í klippimynd,“ segir Sigríður. 

Allt í myndbandinu eigi sér eðlilegar skýringar

Hún fullyrðir það að allt sem sjáist á myndbandinu eigi sér eðlilegar skýringar. 

„Það eru mjög fáir sem þekkja til blóðtöku eða hafa verið við slíka athöfn og það eru ekki myndirnar úr myndbandinu sem tala fyrir sig sjálfar heldur þeir sem bjuggu til myndbandið segja fólkinu hvað gerist á því. Oft og tíðum er það ekki einu sinni að eiga sér stað. Á einum stað halda þeir því fram að þarna sé verið að berja folald, það er ekki verið að berja folald þarna,“ segir hún og segir að bóndinn hafi verið að hjálpa merinni, því merum geti reynst hættulegt að liggja við blóðtöku. 

„Ég fullyrði það að ekki ein einasta skeppna kemur út úr þessari athöfn slösuð á sál eða líkama,“ segir Sigríður. 

„Allar fullyrðingar sem koma fram í þessu myndbandi eru rangar og beinlínis fáránlegar. Það er dreginn þarna upp íslenskur maður sem kallar sig dýralögfræðing og þykist vita allt um dýraverndarlög á Íslandi og hann heldur því fram að það sé ólöglegt að smala með hundi og ef að maður smalaði með hundi myndi maður missa leyfið til að halda skeppnur. Þetta er allt rangt. Þú þarft ekki leyfi til að halda skeppnur á Íslandi og það er ekki ólöglegt að smala með hundi.“

„Skríllinn sem hefur risið upp gegn okkur neitar að hlusta“

Hún segir að verði blóðmerahald bannað verði það fyrst og fremst skaðlegt fyrir íslenskt þjóðfélag.

„Ef þetta frumvarp verður að lögum vegna þess að slík lagasetning hún væri algjörlega á skjön við allt réttarfar og grunnstoðir þjóðfélagsins. Það væri eins og ég færi af stað með frumvarp til að banna útvarpsrekstur á Íslandi því það væru svo margir sem létu útvarpsþáttinn ykkar fara í taugarnar á sér,“ segir hún. 

„Blóðmerarhald er eins og annar búskapur og það hefur margoft verið sýnt fram á og verið sagt frá því að þessi hross hafa það mjög gott. Skríllinn sem hefur risið upp gegn okkur neitar að hlusta á það og trúa því.“