Guðmundur: Með ólíkindum hvað liðið hefur staðið sig stórkostlega

„Þetta er með ólíkindum og eiginlega sorgleg niðurstaða eftir þetta allt. Við höfum orðið fyrir sífelldum vonbrigðum og lamdir niður, stigum upp, vorum lamdir niður en stigum upp. Þá er ég að tala um covid-vesenið og hvernig við lentum í því og erum enn að glíma við það,“ sagði Guðmundur við Henry Birgi Gunnarsson eftir leikinn í Búdapest í dag.

„Það voru vonbrigði að upplifa það að Danir skildu ekki vinna Frakka og við skildum ekki komast inn í undanúrslit sem við áttum skilið. Mér fannst við líka eiga skilið að vinna í dag. Við fengum gullið tækifæri undir lok venjulegs leiktíma en boltinn fór hársbreidd framhjá. Þetta er ótrúlegt. Svo var jafnt á öllum tölum í framlengingunni og þetta gat farið á hvorn veginn sem var.“

Þrái að við fáum að stilla upp okkar sterkasta liði

Íslenska liðið vann fimm af átta leikjum sínum á EM og tapaði þremur, þar af tveimur með einu marki, þrátt fyrir að vera án fjölda lykilmanna.

„Mér þætti gaman að stilla okkar sterkasta liði upp á móti þessum liðum í dag. Ég þrái að það gerist og við fáum að sjá það. Í fyrsta lagi fengum við menn inn sem hafa verið lokaðir inni á hótelherbergi síðustu daga og ekki getað æft. Svo bættust meiðsli ofan á það og við áttum bara einn línumann eftir,“ sagði Guðmundur en Þráinn Orri Jónsson meiddist um miðjan fyrri hálfleik og komast ekkert við sögu eftir það. Arnar Freyr Arnarsson og Elliði Snær Viðarsson eru enn í einangrun.

„Það er með ólíkindum hvað liðið hefur staðið sig stórkostlega og þessir leikmenn, ég á ekki orð til að lýsa þessu. Þvílíkir karakterar, þvílíkir sigurvegarar. Það er búið að slá okkur margoft í gólfið en við stóðum alltaf upp aftur og komum tvíefldir til baka. Ég hef aldrei upplifað svona áður.“

Búinn að vera undir ansi miklum þrýstingi

Þegar Guðmundur tók við íslenska landsliðinu í þriðja sinn 2018 setti hann sér það markmið að koma því aftur á meðal átta bestu liða heims. Og það tókst. Guðmundur segir að síðustu ár hafi tekið á.

„Ég er búinn að vera undir ansi miklum þrýstingi sem þjálfari og þetta hefur verið mjög erfitt. Mér fannst menn ekki hafa almennilegan skilning á þessu þegar ég sagðist ætla að gera þetta 2018. Mér fannst menn ekki tengja við það, ég skal játa það,“ sagði Guðmundur.

„Ég veit að þegar við erum að taka skrefin fram á veginn, bæta okkur og leikmennirnir að þroskast liggjum við stundum vel við höggi. Það hefur verið þannig. En ég sjálfur hafði þessa sýn og setti hana fram og núna er hún að koma í ljós. Þetta er þrotlaus vinna og þetta gerist ekkert á einni nóttu ef menn halda það.“