Skjálfti við Ingólfsfjall í nótt

Gunnar Reynir Valþórsson skrifar 30. desember 2021 06:53

Ingólfsfjall skalf nú í morgunsárið. Vísir/Vilhelm

Jarðskjálfti upp á 3 stig reið yfir í nótt, klukkan sextán mínútur yfir fjögur. Í þetta skiptið skalf jörð þó ekki í grennd við Fagradalsfjall, heldur átti skjálftinn upptök sín um átta kílómetra austur af Hveragerði, í Ingólfsfjalli.

Skjálftinn fannst í Hveragerði, á Selfossi og í Grímsnesi.

Í gær mældust um 400 skjálftar að sögn Veðurstofunnar og virðist virknin fara minnkandi. Í fyrradag mældust til að mynda 1.300 jarðskjálftar á öllum Reykjanesskaganum. Í gærmorgun kom síðast stóri skjálftinn á Reykjanesi, sá reið yfir klukkan tuttugu og tvær mínútur yfir tíu og mældist 3,7 stig. Hann fannst vel á höfuðborgarsvæðinu og víðar.

Annar stór skjálfti, upp á 3,6 stig kom einnig í gær þegar klukkan var kortér gengin í þrjú en sá varð í Bárarbungu.

Eldgos og jarðhræringar Hveragerði Árborg Ölfus

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.