Lífið samstarf

Prjónauppskriftir á mannamáli í nýrri bók

Sögur útgáfa
Eygló Gísladóttir

Prjón er snilld er heiti nýrrar uppskriftabókar eftir Sjöfn Kristjánsdóttur. Sögur útgáfa gefa bókina út.

 Bókin inniheldur 63 uppskriftir að peysum fyrir bæði börn og fullorðna, uppskriftir að buxum, sokkum, vettlingum og ungbarnasettum. Eygló Gísladóttir tók myndirnar í bókina.

Sjöfn Kristjánsdóttir safnaði saman vinsælustu uppskriftunum sínum uppáhalds í þessa bók.

Þetta er önnur bók Sjafnar en fyrir liggur eftir hana bókin Una prjónabók sem hún vann ásamt Sölku Sól. Sjöfn hefur einnig gefið út yfir 200 prjónauppskriftir á vefsíðunni Stroff.is og rekur prjónaverslunina Stroff í Skipholti 25.

„Uppskriftirnar í bókinni eru misflóknar en ég útskýri þær vel og set einnig inn hlekki á myndbönd sem hægt er að styðjast við. Í bókinni eru einnig tvær opnur með útskýringum á því hvernig prjóna á hæl, þumal og fleira sem þarf að kunna í uppskriftunum. Erfiðleikastig uppskrifta merki ég með einum hnykli og upp í þrjá. Þrír hnyklar eru þá flóknari uppskriftir,“ útskýrir Sjöfn en undirtitill bókarinnar er einmitt 63 uppskriftir á mannamáli.

Hún segir áhuga á prjónaskap mikinn. Fólk sæki í þá innri ró sem fylgi því að prjóna.

Eygló Gísladóttir

„Þetta er hálfgert prjónajóga og mikil núvitund. Undanfarin ár hefur mikil vakning orðið í prjónaheiminum og ungar stelpur fóru að prjóna og setja inn á Instagram til dæmis. Í covid varð enn meiri vakning þegar fólk fór að leita sér að áhugamáli til að stunda heima. Ég vona að sá áhugi haldist áfram. Það er líka í tísku að vera í prjónuðum peysum og að hafa krakka í heimaprjónuðu. Nú eru stuttar mittispeysur mjög vinsælar, blöðruermar, gatamunstur og kaðlar. Það má segja að í dag blandist saman nokkrir áratugir í tísku,“ segir Sjöfn en fjölmargar uppskriftir að fallegum peysum er að finna í bókinni.

Eygló Gísladóttir

Sjálf fór Sjöfn að prjóna 12 ára og allt í höndunum. Prjónavélar hafa ekki heillað hana.

„Vélprjón er allt annar handleggur og einnig erfiðara að eiga við munstur í prjónavélum. Mér finnst bara svo stór hluti af þessu að sitja með prjónana í höndunum og ég nýti oft tímann og hlusta á hljóðbækur og hlaðvarp á meðan. Ég er hrifin af því að vera með grófa prjóna og gróft band og þá er ég bara nokkur kvöld að prjóna peysu,“ segir Sjöfn.

Nánari upplýsingar hér.

Eygló Gísladóttir





Fleiri fréttir

Sjá meira


×