Koma ný inn í eig­enda­hóp KPMG

Í tilkynningu frá KPMG segir að þau hafi bæði starfað hjá KPMG um árabil.

„Guðrún Björk Stefánsdóttir hefur bæst í hóp eigenda hjá KPMG. Guðrún Björk hefur unnið hjá ráðgjafarsviði KPMG í 15 ár og verið einn helsti sérfræðingur félagsins í gerð fjárhagslegra áreiðanleikakannana. 

Hún hefur leitt flestar þær áreiðanleikakannanir sem framkvæmdar hafa verið af KPMG á undanförnum árum og hefur með þeim hætti tekið þátt í þó nokkrum af stærstu viðskiptum með félög á markaði á Íslandi. 

Hún er með masterspróf í viðskiptafræðum frá Háskóla Íslands og vann í bankakerfinu áður en hún hóf störf hjá KPMG, lengst af í SPRON. Síðan þá hefur Guðrún Björk aflað sér margvíslegrar viðbótarreynslu. 

Guðrún Björk starfaði í tvö ár hjá KPMG í Danmörku og vann þar í ráðgjafarverkefnum vítt og breitt á Norðurlöndunum. Guðrún Björk leiðir ásamt félögum sínum ört stækkandi ráðgjafahóp innan KPMG en sviðið telur nú á vel á fimmta tug starfsmanna.

Magnús Ólafur Kristjánsson er nýr í eigendahópi KPMG. Magnús er Vopnfirðingur en hefur búið og starfað hjá KPMG á Akureyri í rúm tuttugu ár. Magnús er með próf í Hagfræði og MBA gráðu frá Háskóla Íslands. 

Magnús hefur unnið að mörgum verkefnum í ráðgjöf og reikningshaldi og hafa einkum sjávarútvegsfyrirtæki og sveitarfélög notið hans aðkomu á liðnum árum auk fjölda annarra viðskiptavina. 

KPMG hefur lagt kapp á að þjóna viðskiptavinum á öllu landinu og starfar nú þriðjungur starfsfólks utan Reykjavíkur. KPMG hefur byggt upp þétt net starfsstöðva á landsbyggðinni og er skrifstofan á Akureyri þeirra stærst. Þar mun Magnús hafa aðsetur en þjónar áfram viðskiptavinum um allt land enda byggir nútíma þjónusta á því að kalla til þá hæfustu hverju sinni, óháð búsetu eða starfsaðstöðu,“ segir í tilkynningunni.