Innlent

Tekist á um fjárlagafrumvarp undir tímapressu á Alþingi

Heimir Már Pétursson skrifar

Fyrsta umræða um fjárlagafrumvarp ríkisstjórnarinnar hófst í dag. Fjármálaráðherra segir frumvarpið styðja við uppbyggingu á flestum sviðum og góða opinbera þjónustu án þess að skera þurfi niður eða hækka skatta. Stjórnarandstaðan segir frumvarpið hins vegar marka kyrrstöðu og samdrátt á sumum sviðum.

Þingið er í nokkurri tímapressu að ljúka þremur umræðum um fjárlagafrumvarpið enda bara þrjár vikur til jóla. Það er kannski ástæða þess að nýr formaður fjárlaganefndar sendi frumvarpið til umsagnar úti í þjóðfélaginu áður en umræðan hófst og áður en fjárlaganefnd hafði komið saman, sem hleypti illu blóði í stjórnarandstöðuna á Alþingi í dag. Þingmenn fóru hver á fætur öðrum í ræðustól og gagnrýndu þessi vinnubröð og lásu ýmislegt í þau.

Halldóra Mogensen þingmaður Pírata sagði stjórnarflokkana vera að bregðast við því að stjórnarandstaðan hafi ekki viljað semja um lengd umræðunnar um fjárlagafrumvarpið.

Halldóra Mogensen telur ríkisstjórnina hafa verið að reyna að stytta afgreiðslutíma fjárlaga með því að senda fjárlagafrumvarpið út til umsagnar áður en það kom til fjárlaganefndar.Vísir/Vilhelm

„Það er verið að grafa undan aðhaldsgetu stjórnarandstöðunnar. Það er verið að grafa undan þingræðinu með skrefum. Mér finnst að forseti eigi að taka þetta fyrir og biðja formann fjárlaganefndar að koma hinað sérstaklega upp og gera grein fyrir þessari ákvörðun sinni,“ sagði Halldóra og beindi orðum sínum til Birgis Ármannssonar forseta Alþingis.

Bjarkey Olsen Gunnarsdóttir nýkjörinn formaður fjárlaganefndar sagði þetta ekki hafa verið gert með annarleg sjónarmið í huga.

Bjarkey Olsen Gunnarsdóttir þingmaður Vinstri grænna og nýkjörin formaður fjárlaganefndar.Vísir/Vilhelm

„Ég ætla nú bara að biðjast afsökunar á þessum mistökum mínum sem formanns fjárlaganefndar. Ég tek það á mig. Mér var tjáð að þetta hefði verið venja og hefði verið í áratugi með umsagnarferli fjárlaganefndar. Síðan hefði það verið tekið fyrir á fyrsta fundi hennar hvort bæta ætti við og svo framvegis,“ sagði Bjarkey.

Ítrekaði afsökunarbeiðni sína

Halldóra gaf ekki mikið fyrir þessi svör formanns fjárlaganefndar.

„Þau eru hrædd um það að þau séu að brenna inni á tíma með fjárlagafrumvarpið. Þannig virkar þessi leikur. Þess vegna er þetta gert og ég tek þessa afsökunarbeiðni alls ekki gilda,“ sagði Halldóra.

Fleiri stjórnarandstöðuþingmenn tóku undir þetta þótt aðrir væru einnig reiðubúnir að fyrirgefa formanninum þessa yfirsjón. Eftir all nokkrar ræður kom formaðurinn aftur í ræðustól.

„Alveg eins og hér hefur komið fram, þetta er vond venja hafi hún verið venja. Ég tek það algerlega til mín að þetta er ekki gott start á nefndarstörfunum. Og eins og ég segi ég get ekki gert annað en beðist afsökunar. Ég vona að í framhaldinu eigum við gott samstarf í fjárlaganefnd og ég trúi því og treysti,“ sagði Bjarkey Olsen.

Fyrsta umræða um fjárlagafrumvarpið mun standa fram á kvöld og verður framhaldið á Alþingi á morgun. Það gæti því hugsanlega komist til nefndar fyrir helgi.

Tvær vonarstjönur tókust á í Pallborðinu

En við fengum einnig tvær kjarnakonur sem komu nýjar inn á þing í haust í beina útsendingu í Pallborðnu á Vísi og Stöð 2/Vísi í dag. Þar tókust þær Kristrún Frostadóttir þingmaður Samfylkingarinnar og Guðrún Hafsteinsdóttir þingmaður Sjálfstæðisflokksins á um framtíðarsýn stjórnvalda, aðgerðir eða aðgerðarleysi þeirra á ýmsum sviðum, eins og í húsnæðismálum.

Kristrún sagði nauðsynlegt að stjórnvöld gripu til langtímaaðgerða í húsnæðismálum.

„Þannig að það þyrfti ekki alltaf allt að fara í bál og brand áður en það er eitthvað gert. Það er verið að tala um harðan kjarasamningavetur. Fjármálaráðherra talar mikið um verðbólgu. Ég hef líka áhyggjur af verðbólgu en ég veit hvaðan hún kemur. Hún kemur frá íbúðamarkaðnum. Þetta eru eignarverðshækkanir og besta leiðin til að draga úr þessari launaþrýstingspressu sem mun óneitanlega koma er að setja meira fjármagn í úrræði í húsnæðismálum," sagði Kristrún.

Kristrún Frostadóttir og Guðrún Hafsteinsdóttir koma báðar með reynslu úr atvinnulífinu inn á þing fyrir Samfylkinguna annars vegar og Sjálfstæðisflokkinn hins vegar.Vísir/Vilhelm

Guðrún sagði líka nauðsynlegt að gera skynsama kjarasamninga. Of miklar launahækkanir þrýstu einnig á verðbólguna.

„Kristrúnu er svo oft tíðrætt um að húsnæðisverðið ýti á verðbólguna. Áhrifaþættir í húsnæðisverði eru fyrst og síðast nafnlaun og svo fjármagnskostnaður. Hér er alltaf verið að gagnrýna Seðlabankann fyrir að hækka vexti. Hvað er Seðlabankinn að gera? Hann er ekki að gera neitt annað en reyna að ná tökum á verðbólgunni. Sem er einmitt það sem Kristrún talar mikið um að við þurfum að gera,“ sagði Guðrún Hafsteinsdóttir.

Hér má horfa á Pallborðið í heild sinni.


Tengdar fréttir

Vonarstjörnur hvor af sínum vængnum takast á um stóru málin

Alþingi hófst fyrir alvöru í gær þegar kosið var í fastanefndir þingsins og umræður fóru fram um fyrstu stefnuræðu Katrínar Jakobsdóttur forsætisráðherra í endurnýjaðri ríkisstjórn. Heimir Már Pétursson fréttamaður fær til sín kjarnakonurnar Kristrúnu Frostadóttur þingmann Samfylkingarinnar og Guðrúnu Hafsteinsdóttur þingmann Sjálfstæðisflokksins í beina útsendingu í Pallborðinu á Vísi og Stöð 2/Vísi í dag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.