Innlent

Franskur graffari djúpt snortinn af viðbrögðum við ólöglegu veggjakroti hans í Laugardal

Snorri Másson skrifar
Kraak-N er heiti nafnlauss myndlistamanns sem setti mark sitt á nýmálaðan bílskúrsvegg í Laugardal í vikunni. Höfundurinn er franskur og var í fríi á Íslandi, en er nú farinn heim. Íbúarnir eru í skýjunum með verkið - og hann þar með líka. Á myndinni til hægri sést það sem séð verður af listamanninum.
Kraak-N er heiti nafnlauss myndlistamanns sem setti mark sitt á nýmálaðan bílskúrsvegg í Laugardal í vikunni. Höfundurinn er franskur og var í fríi á Íslandi, en er nú farinn heim. Íbúarnir eru í skýjunum með verkið - og hann þar með líka. Á myndinni til hægri sést það sem séð verður af listamanninum. Samsett: Instagram/Twitter

Íbúar húsaraðar við Laugalæk eru hæstánægðir með nýtt veggjakrot sem birtist á húsnæði þeirra í vikunni. Það sem einn segir að sé eins og sérpantað listaverk á nýuppgerðum bílskúr er í grunninn ekkert annað en venjulegt graff. Listamaðurinn á bakvið það er glaður að þau séu glöð.

Undravera af kolkrabbaætt tók sér bólfestu á húsveggnum í vikunni. Þegar íbúi sem fréttastofa ræddi við frétti af graffinu hjá syni sínum rauk hann upp og ætlaði að fara að mála yfir það. En þegar hann kom á staðinn var hann frá sér numinn af hrifningu. Það er bara svo flott.

Stöð 2 skoðaði vegginn og ræddi við íbúa á staðnum í dag. Einnig var staldrað við önnur vegglistaverk bæjarins: 

„Ég held að flestir séu bara jákvæðir. Það var umræða í hópnum og flestir voru bara mjög ánægðir með þessa viðbót, við vorum nýbúin að taka húsið í gegn og láta mála það og þetta var bara eins og punkturinn yfir i-ið,“ segir Elín Vignisdóttir, íbúi í húsinu, í samtali við fréttastofu.

Frakki á ferðalagi skemmdarvargurinn, eða listamaðurinn

Heiðurinn að verkinu á 25 ára gamall franskur myndlistarmaður sem notast við merkinguna Kraak-N og málar helst skrímsli í anda goðsagnakvikindisins Kraken.

Kraken er upphaflega norræn goðsögn um ógurlegt sæskrímsli, rótgróin hjátrú á meðal sjómanna. Margir þekkja ófreskjuna úr Pirates of the Caribean.Vísir/Vilhelm

Fréttastofa náði tali af listamanninum á Instagram og hann var ekki til í viðtal undir nafni, enda segir hann fólk stundum ósátt við það bessaleyfi sem hann taki sér í sinni vinnu. 

Verkið er að hans sögn aðeins eitt af sjö sem hann gerði í stuttu fríi á landinu. Fór með vinum sínum að skoða fossa á daginn en stalst einn út á næturnar með listrænt erindi. Segist elska Reykjavík og kvaðst djúpt snortinn þegar fréttastofa greindi honum frá viðtökum íbúanna. 

„Mér finnst einmitt að mín list eigi heima í hversdagslífi fólks,“ skrifar listamaðurinn í svari sínu. „Það sem mér finnst best við furðuverurnar mínar er að þær horfast í augu við áhorfendur sína og gera hversdagsannirnar bærilegri, ekki síst á þessum tíma árs.“

Kraak-N biður blaðamann að koma því á framfæri við Íslendinga að hann sé boðinn og búinn að skreyta valda veggi í Reykjavík þegar hann kemur einhvern tímann aftur. Hann þurfi bara að fá lista af staðsetningum við komuna.

Fín vegglistaverk virðast hafa fælingarmátt gegn verri vegglistaverkum, hefðbundnu kroti. Eftir að vandað verk birtist á vegg í Háteigshverfi losnuðu íbúar við stanslaust ómarkvisst graff, eins og sýnt er í myndbandinu hér að ofan.

Hið sama gerðist á Hofsvallagötu í Vesturbæ. Grindverk þar hafði frá ómunatíð verið þakið misvandaðri vitleysu en þegar Super Mario birtist þar komust íbúarnir að raun um að þegar mikið er lagt í vegglistaverk er það til þess fallið að fá aðra vegglistamenn til að halda að sér höndum í virðingarskyni við það sem fyrir er. Lögmál frumskógarins...


Tengdar fréttir

Áletrun þrifin burt í snarhasti

Hafist var handa við að þrífa stóra áletrun á vegg við Skúlagötu í miðbæ Reykjavíkur síðdegis í dag.

Glænýr og allt öðruvísi Flatus lifir

Listaverk sem hefur lifað með þjóðinni áratugum saman hefur tekið á sig nýja mynd í Kollafirði. Flatus lifir enn og nafn hans vísar að þessu sinni til vindgangs í huga listamannsins.

Ekki krotað meira á veggi í tvö ár

Þrátt fyrir að færri eignaspjöll hafi verið framin á höfuðborgarsvæðinu í júlí en í júní hafa ekki verið framin fleiri „meiriháttar eignaspjöll“ í einum mánuði síðan í október



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.