Innlent

Bindur vonir við að örvunar­skammtur auki ó­næmi í sam­fé­laginu

Kjartan Kjartansson skrifar
Þórólfur Guðnason, sóttvarnalæknir, þegar hann var bólusettur í Laugardalshöll fyrr á þessu ári.
Þórólfur Guðnason, sóttvarnalæknir, þegar hann var bólusettur í Laugardalshöll fyrr á þessu ári. Vísir/Vilhelm

Sóttvarnalæknir bindur vonir við að örvunarskammtar bóluefnis gegn kórónuveirunni hjálpi mikið til við að auka ónæmi í samfélaginu gegn veirunni. Til stendur að hefja fjöldabólusetningu með örvunarskammti í næstu viku.

Tilkynnt var um hertar sóttvarnaaðgerðir vegna fjölgunar smita innanlands á föstudag. Þann dag greindust 167 manns smitaðir af veirunni og hafa þeir ekki verið fleiri frá upphafi faraldursins. Á föstudag og laugardag greindust á bilinu níutíu til hundrað manns hvorn dag. Þórólfur Guðnason, sóttvarnalæknir, sagði að í gær hafi fjöldinn verið töluvert yfir hundrað manns í viðtali við Bítið á Bylgjunni í morgun.

Enn sé þó langt í hjarðónæmi sem geti ráðið niðurlögum faraldursins. Aðeins sé staðfest að á bilinu þrettán til fjórtán þúsund manns hafi smitast af veirunni þó að sennilega hafi fleiri smitast án þess að gera sér grein fyrir því. 

Til þess að losna út úr Covid-ástandinu þurfi annað hvort að vera góð meðferð við veikinni til staðar eða að ná hjarðónæmi með annað hvort náttúrulegri sýkingu eða bóluefnum. Undanfarna daga hafa borist fréttir af lyfjum gegn Covid-19 sem lyfjarisarnir Merck og Pfizer eru með í þróun. Þórólfur sagðir að í ljós þyrfti að koma hvernig þau gagnist.

Hvað hjarðónæmi varðaði væri það mun vænlegri kostur að ná því með bólusetningu en náttúrulegu smiti.

„Hitt heldur okkur í heljargreipum í einhverja mánuði eða einhver ár, það er erfitt að segja, en allavegana langan tíma og við þurfum að halda því þannig niðri með einhverjum samfélagslegum aðgerðum þannig að það keyri ekki yfir allt. Annars getum við lent í gríðarlega miklum vandamálum ef við látum þetta bara blússa yfir samfélagið einn, tveir og þrír og gerum ekkert til að spyrna við fótum,“ sagði hann.

Sjaldséðar aukaverkanir örvunarskammta

Því sagðist Þórólfur binda vonir við að örvunarskammtar geti hjálpað mikið. Til stendur að hefja aftur fjöldabólusetningu ákveðinna hópa í Laugardalshöll í næstu viku og rætt hefur verið um að bjóða öllum sem vilja örvunarskammt á næsta ári.

Þó að bóluefnin sem hafa verið gefin veiti öfluga vernd fyrir alvarlegum veikindum og dauðsföllum eru þau síður virk í að koma í veg fyrir smit. Þórólfur sagði erlendar rannsóknir benda til þess að örvunarskammtur auki ónæmi og að alvarlegar aukaverkefni séu afar sjaldséðar.

„Aukaverkarnir eftir bólusetninguna eru miklu sjaldséðari en eftir Covid þannig að ef maður ætlar að velja á milli þess að fá Covid eða bólusetningu þá er miklu líklegra að maður fari verr út úr Covid-sýkingunni en bólusetningunni,“ sagði sóttvarnalæknir.

Enn eru um ellefu prósent fólks tólf ára og eldra sem hafa ekki sinnt boðun í bólusetningu. Þórólfur segir að hluti af þeim hóp sé líklega búsettur annars staðar, aðrir séu mögulega fólk af erlendum uppruna sem sé ekki inni í umræðunni.

„Svo er hópur sem vill ekki láta bólusetja sig, hvað sem tautar og raular. Danir hafa slegið á að það séu kannski fimm prósent. Við munum reyna allt sem við getum að ná í þann hóp en við vitum ekki hvernig það mun enda.“


Tengdar fréttir

Land­spítalinn á hættu­stig

Landspítali var færður á hættustig kl. 16 í dag. Í tilkynningu á Facebooksíðu spítalans segir að þá hafi viðbragðsstjórn komið saman til fundar ásamt farsóttanefnd og tekið ákvarðanir sem varða breytta starfsemi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.