Innlent

For­eldrar orðnir lang­þreyttir á á­standinu og vilja sjá al­vöru að­gerðir

Fanndís Birna Logadóttir skrifar
Eyrún Helga Aradóttir, formaður foreldrafélags Laugarnesskóla, segir skólann löngu sprunginn og vill að borgaryfirvöld standi við gefin loforð. 
Eyrún Helga Aradóttir, formaður foreldrafélags Laugarnesskóla, segir skólann löngu sprunginn og vill að borgaryfirvöld standi við gefin loforð. 

Framtíðarskipan skóla- og frístundastarfs í Laugarnes- og Langholtshverfi voru til umræðu innan borgarráðs í gær en gert er ráð fyrir mikilli fjölgun nemenda í hverfinu á næstu árum. Formaður foreldrafélags Laugarnesskóla fagnar því að samtal eigi sér nú stað um stöðuna en segir foreldra langþreytta á aðgerðarleysi stjórnvalda.

Í skýrslu starfshóps sem skipaður til að rýna í stöðu skóla- og frístundastarfs í hverfinu eru lagðar fram þrjár sviðsmyndir til að bregðast við fjölgun nemenda í Laugarnesskóla, Laugalækjarskóla og Langholtsskóla.  

Sviðsmynd eitt er að skólarnir verði starfræktir í óbreyttri mynd en byggt við  þá alla. 

Sviðsmynd tvö er að tveir elstu árgangar Laugarnesskóla verði færðir yfir í Laugalækjarskóla og byggt við hann, en auk þessi verði byggt við Langholtsskóla á meðan fyrsti og annar bekkur Langholtsskóla fái aðstöðu í Dalheimum. 

Sviðsmynd þrjú er að opnaður verði nýr unglingaskóli í Laugardal fyrir alla unglinga úr skólunum þremur. 

Spár til 20 ára, sem unnið er eftir, gera ráð fyrir fjölgun nemenda í þessum þremur skólahverfum úr 1.648 árið 2020 í 1.774 árið 2040. Staðan er verst í Laugarnesskóla, þar sem nú eru 158 nemendur umfram þol húsnæðisins og verða 252 árið 2030 að öllu óbreyttu. 

Eyrún Helga Aradóttir, formaður foreldrafélags Laugarnesskóla, segir skólann löngu sprunginn.

„Við tökum fagnandi þátt í þessu samtali en núna er foreldrahópurinn og samfélagið hérna í Laugarneshverfi orðið langþreytt. Við viljum sjá einhverjar efndir, við viljum að efndir fylgi orðum,“ segir Eyrún en hún segir sviðsmynd eitt líklegasta til að hugnast fólki, þar sem það hefur minnst áhrif á hverfasamfélagið. 

Ekki nýtt samtal

Eyrún bendir þó á að samtalið um stöðu skólamála í hverfinu sé ekki að hefjast fyrst núna, heldur hafi skólastjórnendur ítrekað bent á versnandi stöðu mála, án árangurs.

„Það er frábært að Reykjavíkurborg ætli að bjóða okkur upp á þetta samtal núna en því skal samt haldið til haga að þetta samtal hefur staðið yfir í átta ár. Þetta er ekkert nýtt samtal. Endurtekið hefur stefnumarkandi vinnu skólastjórnenda og vinnuhópa verið stungið ofan í skúffu og það er bara staðreynd,“ segir Eyrún.

Kennt er í 7 færanlegum kennslustofum í dag, kennsla í verklegum- og listagreinum hefur liðið fyrir húsnæðisskort og innviðir starfsemi skólans löngu komnir langt yfir þolmörk. 

Hún bendir einnig á að fjölgun nemenda hafi einnig haft áhrif á aðra þætti, til að mynda íþrótta og frístundastarf en nemendur þurfa nú að ferðast langar vegalengdir fyrir slíkt auk þess sem  íþróttahúsið er barn síns tíma. 

Öll aðstaða, hvort sem það sé fyrir nemendur, kennara eða aðra starfsmenn skólans, er að sögn Eyrúnar óviðunandi og við því þurfi að bregðast.

„Þetta er okkar hjartans mál og við vitum líka að ákvörðun sem verður tekin, hún hefur áhrif á framtíðarskipan skólans og ekkert eingöngu varðandi skólann heldur líka bara varðandi hverfið okkar og þróun hverfisins næstu áratugi. Þannig að samfélagið í skólakerfi Laugarnesskóla ætlar að láta sig málið varða.“


Tengdar fréttir

Börnin í sömu klípu og Jón Arnór fyrir 30 árum: „Aðstaðan er ekki boðleg“

Það ríkir neyðarástand hjá einni stærstu körfuknattleiksdeild landsins, Ármanni, vegna aðstöðuleysis í Laugardal. Jón Arnór Stefánsson hitti Gaupa í pínulitlum íþróttasal sem félagið notar og sagði aðstöðuna jafnvel enn verri en þegar hann neyddist til að sækja æfingar úr Laugardal í Vesturbæinn á sínum tíma.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.