For­sætis­ráð­herra Norður-Makedóníu segir af sér

Zaev greindi frá afsögninni í gærkvöldi og sagðist hann vilja axla ábyrgð á lélegri kosningu Jafnaðarmannaflokks hans í sveitarstjórnarkosningunum. „Ég axla ábyrgð á stöðunni. Ég segi af mér sem forsætisráðherra og flokksformaður. Ég hef skilað frelsi og lýðræði og lýðræði hefur í för með sér að maður axlar ábyrgð,“ sagði Zaev.

Zaev hefur talað fyrir nánari tengslum Norður-Makedóníu og Evrópusambandsins. Þannig átti hann mikinn þátt í leysa úr áralangri deilu Norður-Makedóníu og Grikkja um nafnið Makedónía þar sem niðurstaðan var sú að Makedónía tók formlega upp nafnið Norður-Makedónía.

Hann segist styðja það að annar maður úr ranni Jafnaðarmannaflokksins taki nú við forsætisráðherra, frekar en að þingkosningum verði flýtt.

Í höfuðborginni Skopje hlaut frambjóðandi stjórnarandstöðunnar, Danela Arsovska, 56 prósent atkvæða í kosningum til borgarstjóra, en frambjóðandi Jafnaðarmanna, Petre Sigelov, um 40 prósent.

Í frétt DW segir að svo virðist sem að stærsti stjórnarandstöðuflokkurinn, miðhægriflokkurinn VMRO-DPMNE, hafi unnið sigra í áttatíu sveitarfélögum, en Jafnaðarmannaflokkurinn í innan við tuttugu. Til samanburðar vann Jafnaðarmannaflokkurinn sigra í 57 sveitarfélögum í kosningunum 2017.

Zaev gegndi fyrst embætti forsætisráðherra Norður-Makedóníu á árunum 2017 til ársbyrjunar 2020 og aftur frá ágúst 2020.