Skólastjórar í næturvinnu við að rekja smit

Þeim börnum undir tólf ára aldri sem greinst hafa með kórónuveiruna undanfarið hefur fjölgað ört. Í ágúst og september greindust nærri átta hundruð börn með kórónuveiruna en um 4.200 voru sett í sóttkví þessa tvo mánuði.

Síðasta vetur giltu reglur um hólfaskiptingu í grunnskólum þannig að ef barn greindist með veiruna þá voru allir í sama hólfi settir í sóttkví. Nú í haust er reynt að haga skólastarfinu með sem eðlilegustum hætti og hólfaskiptin er því ekki lengur til staðar. Þetta þýðir að þegar börn greinast með veiruna í skólunum þarf að fara fram umfangsmikil smitrakning innan skólanna til að finna út hverjir þurfa að fara í sóttkví út frá gildandi reglum. Skólastjórnendur þurfa sjálfir að sjá um smitrakninguna en slíkt getur verið tímafrekt. 

„Þetta er með þeim hætti í dag að skólastjórar frá tilkynningu þegar upp kemur smit yfirleitt síðari part dags og það bara farið í það, kvöld og jafnvel langt fram á nætur, í skólum að rekja smit með hringingum í fólk um það hvort þessi eða hinn hafi verið í návígi við þennan eða hinn og svo framvegis. Svo þarf að hafa samband við fólk þannig að allt sé nú klárt að morgni næsta dags og þetta er bara verkefni sem er ekki bætandi á skólastjórendur sem hafa í nógu að snúast,“ segir Þorsteinn Sæberg formaður Skólastjórafélags Íslands.

Í Norðlingaskóla hefur skólastjórinn sjö sinnum þurft að fara í smitrakningu þó aðeins séu liðnir tæpir tveir mánuðir af skólaárinu. Þá eru dæmi um að börn þar hafi þurft að fara þrisvar í sóttkví. Hann segir skólastjórnendur hvorki geta staðið í smitrakningunni sjálfir þegar hún er orðin svona umfangsmikil né sé hægt að nýta aðra starfsmenn skólanna í verkefnið.

„Skólastjórar og annað starfsfólk er í raun og veru í fullri starfi og það er ekki bætandi þessu verkefni á starfsfólk skólanna og allra síst skólastjórnendur. Þó að þeir hafi reynt eins og þeir hafa getað að sinna því. Það verður þá bara að koma aukið starfsfólk að skólunum þegar upp kemur smit til þess að sinna þessu tiltekna verkefni. Þetta gengur ekki með þessum hætti.“

Vilja skoða aðrar leiðir

Þórólfur Guðnason sóttvarnalæknir sagði í fréttum okkar í gær að að væri í skoðun að breyta leiðbeiningum um sóttkví. Þorsteinn segir stjórnendur skólanna kallar eftir því að reglur um sóttkví verði endurskoðaðar.

„Það er auðvitað ljóst að menn eru auðvitað farnir að velta því fyrir sér hvort að þetta að senda fólk í sóttkví innan úr skólunum sé nákvæmlega endilega sú lausn sem við eigum að búa við áfram. Hvort að það eigi bara að senda þann smitaða í viðeigandi aðgerðir sem er þá að senda hinn smitaða í sóttkví en hætta kannski að rekja upp ákveðinn fjölda einstaklinga sem hefur hugsanlega verið í návígi við viðkomandi. Því að það er það sem er að valda þessari auknu vinnu og auknu álagi.“

Þannig sé mikilvægt að skoða aðrar lausnir og leiðir. „Ef þær eru ekki til þá þarf að koma með aukinn mannafla. Það gengur ekki að hafa þetta svona í vetur. Það er alveg ljóst.“