Lífið

„Þetta er ástarsaga“

Stefán Árni Pálsson skrifar
Auðunn Blöndal leikur aðalhlutverkið í kvikmyndinni Leynilögga. 
Auðunn Blöndal leikur aðalhlutverkið í kvikmyndinni Leynilögga. 

Bússi er harðasta löggan í bænum en málin flækjast þó þegar hann fær nýjan samstarfsfélaga, pankynhneigða heimsmanninn Hörð Bess.

Saman berjast þeir við hættulegustu glæpamenn landsins sem og eigin tilfinningar. Þetta er sögulína kvikmyndarinnar Leynilöggunnar sem er með Auðunni Blöndal í aðalhlutverki ásamt einvala liði.

Sindri Sindrason ræddi við Audda í Íslandi í dag í gærkvöldi. Kvikmyndin var forsýnd í gærkvöldi.

„Ég er mun spenntari fyrir Leynilöggunni heldur en James Bond ef ég á að vera alveg hreinskilinn. Myndin verður sýnd um allt land,“ segir Auðunn en hugmyndin að kvikmyndinni kviknaði fyrir tíu árum þegar Auddi vann svokallaða trailerakeppni gegn Sveppa. 

Fljótlega var skrifað handrit en Hannes Þór Halldórsson, leikstjóri kvikmyndarinnar, varð að fresta verkefninu í tíu ár vegna ferils hans í atvinnumennsku í knattspyrnu.

„Hann bað mig um að reyna halda einhverjum smá vinsældum þangað til hann kæmi heim aftur og ég reyndi það,“ segir Auddi.

„Við vorum ekki lengi að fatta að það myndi enginn nenna að horfa á okkur hlaupa um í níutíu mínútur að gera eitthvað rosalega töff lögguhluti. Við þurftum því að hugsa eitthvað sem hefur ekki sést áður í svona mynd. Okkur fannst því vanta smá dýpt í karakterinn,“ segir Auðunn.

„Bússi er inni í skápnum og hittir svo Hörð Bess og fattar þá að hann er hrifinn af honum, eitthvað sem er búið að vera stríða honum öll þessi ár. Þetta er ástarsaga. Myndin er grín hasarmynd en það sem ég hef dýrkað við þessa dóma erlendis frá er að við erum ekki að gera neitt grín að þessu, þetta er bara ástarsaga inni í myndinni,“ segir Auddi en hér að neðan má sjá innslagið í heild sinni.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.