„Hefur hjálpað mér persónulega í gegnum mitt þunglyndi“

Stefán Árni Pálsson skrifar 18. október 2021 14:31

Carlos Reynir hefur barist við þunglyndi og kvíðaröskun og hjálpaði LARPIÐ umtalsvert.

Þættirnir Afbrigði í umsjón Ingileifar Friðriksdóttur hófu göngu sína á Stöð 2 á dögunum en þar er fjallað um fólk sem lifir óhefðbundnum lífsstíll og er óhætt að segja að um afar sérstaka og öðruvísi þætti sé að ræða.

Í síðasta þætti einbeitti Ingileif sér að því sem kallast LARP. Einn viðmælenda Afbrigðis segir að LARP sé í raun spunaspil nema þátttakendur klæða sig upp í búninga og taka beint þátt í spilinu. Live Action Role Playing, eða rauntímaspunaspil er þýðingin á LARPI.

Í þættinum var rætt við Carlos Reyni sem segir að LARP hafi hjálpað honum í gegnum þunglyndi og kvíðaröskun.

„LARP hefur mjög marga eiginleika og hefur hjálpað mér persónulega í gegnum mitt þunglyndi og mína kvíðaröskun. Það eru einhverjir sálfræðingar að hjálpa krökkum að ganga í gegnum allskonar vandamál með LARPI,“ segir Carlos.

„Ég var frekar lokaður af áður en ég byrjaði í þessu. Mér finnst þetta hjálpa mér mikið með það að vera meira út á við. Og þarf ekki að halda jafn mikið aftur af mér í samskiptum við fólk,“ segir Albert Rúnarsson.

Klippa: LARPIÐ hjálpaði Carlos í gegnum þunglyndi og kvíðaröskun

Afbrigði