Losun koltvísýrings að ná fyrri hæðum

Gunnar Reynir Valþórsson skrifar 14. október 2021 07:00

Losun koltvísýrings er að ná þeim hæðum sem hún stóð í áður en kórónuveirufaraldurinn fór um heimsbyggðina. epa

Losun koltvísýrings fer nú aftur vaxandi í heiminum og samkvæmt nýrri skýrslu hefur hann aukist í 20 ríkustu löndum jarðar miðað við síðasta ár.

Í skýrslunni, sem ber heitið Gagnsæi í loftslagsmálum, er því spáð að losun koltvísýrings verði fjögur prósent meiri á þessu ári á meðal tuttugu ríkustu landa heims eftir að losunin hafði minnkað um sex prósent á síðasta ári, aðallega út af kórónuveirufaraldrinum.

Skýrsluhöfundar búast jafnramt við því að Kínverjar, Indverjar og Argentínumenn fari jafnvel fram úr útblæstrinum eins og hann var árið 2019, að því er segir í frétt breska ríkisútvarpsins BBC.

Hálfur mánuður er nú þar til ný loftslagsráðstefna hefst, að þessu sinni í Glasgow, og ljóst er samkvæmt skýrslunni að lítið gengur hjá iðnvæddu þjóðum heims að draga úr losun, sem þær hafa þó fyrir löngu sammælst um að gera.

G20-hópurinn svokallaði, sem skýrslan fjallar um, er ábyrgur fyrir um 75 prósentum af öllum útblæstri í heiminum og því ljóst að þau ríki þurfa sérstaklega að sýna í verki að hægt sé að draga úr losun.

Loftslagsmál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.