Stal veiðigræjum að andvirði þriggja milljóna

Hallgerður Kolbrún E. Jónsdóttir skrifar 13. október 2021 15:34

Maðurinn var dæmdur í þrjátíu daga skilorðsbundið fangelsi vegna stuldsins. Vísir/Vilhelm

Karlmaður hefur verið dæmdur í þrjátíu daga skilorðsbundið fangelsi fyrir að hafa stolið veiðivörum og íþróttafötum að andvirði rúmra þriggja milljóna króna úr bíl í júní í fyrra. Maðurinn er þá jafnframt sakfelldur fyrir að hafa stolið mat- og snyrtivöru úr Bónus sem alls hefði kostað hann rétt tæpar 5.000 krónur að greiða fyrir.

Veiðivarningnum og íþróttafötunum stal maðurinn, ásamt öðrum, úr bifreið sem stóð á bílastæði í Reykjavík en varningurinn fannst svo allur á heimili mannsins við húsleit lögreglu. Maðurinn játaði brot sín en hann er góðvinur lögreglu og nær sakaferill hans aftur til ársins 2004.

Eigandi veiðivarningsins gerði þá kröfu fyrir dómi að maðurinn skyldi greiða honum fjórar milljónir króna í miskabætur en þeirri kröfu var hafnað af Héraðsdómi Reykjavíkur. Fram kemur í dómnum að fjárhæð kröfunnar sé mun hærri en sú fjárhæð sem vörurnar voru metnar á og ekki lægju fyrir nein gögn sem geti varpað ljósi á meint tjón og umfang þess.

„Ennfremur má skilja ákæru svo að þýfið hafi fundist á ákærða og því ekki víst að bótakrefjandi hafi orðið fyrir tjóni,“ segir í dómnum.

Dómsmál Reykjavík Stangveiði

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.