Innlent

Lítið tal um inn­sigli í greinar­gerðinni sem vakti á­hyggjur lands­kjör­stjórnar

Eiður Þór Árnason skrifar
Ingi Tryggvason, formaður yfirkjörstjórnar í Norðvesturkjördæmi.
Ingi Tryggvason, formaður yfirkjörstjórnar í Norðvesturkjördæmi. Vísir/Tryggvi

Morguninn eftir að lokatölur voru gefnar út í Norðvesturkjördæmi kom í ljós að átta atkvæði sem tilheyrðu lista Sjálfstæðisflokksins og eitt sem tilheyrði Framsókn hafi verið í atkvæðabunka Viðreisnar.

Mistökin urðu ljós eftir að formaður landskjörstjórnar vakti athygli yfirkjörstjórnar í kjördæminu á því að litlu munaði varðandi uppbótarsæti í Norðvestur- og Suðurkjördæmi. Var formaður yfirkjörstjórnar í Norðvestur þá beðinn um að skoða hvort tilefni væri til nánari athugunar.

Með hliðsjón af áðurnefndum atkvæðum taldi yfirkjörstjórn ekki annað fært en að endurtelja öll atkvæði og yfirfara önnur atriði. Þá birtust fleiri annmarkar:

  • Heildaratkvæðum fjölgaði um tvö vegna innsláttarvillu í lok fyrri talningar.
  • Auðir seðlar voru í fyrri talningu taldir vera 394 en reyndust vera 382 og hafði því fækkað um 12. Að sögn yfirkjörstjórnar er skýringin sú að 11 af þessum seðlum voru ógildir en höfðu fyrir mistök verið taldir með auðum seðlum. Þá var einn seðill sem talinn hafði verið ógildur það í raun ekki.
  • Atkvæði D-lista Sjálfstæðisflokks fjölgaði um 10 en þar af voru átta í atkvæðabunka C- lista Viðreisnar, líkt og áður segir. Tvö önnur höfðu mislagt í aðra bunka en D-lista.
  • Allar aðrar breytingar eru sagðar koma til vegna þess að eitt og eitt atkvæði hafði mislagst í atkvæðabunkum.

Þetta kemur fram í greinargerð yfirkjörstjórnar í Norðvesturkjördæmi um framkvæmd kosninga og talningu atkvæða sem unnin var að ósk landskjörstjórnar. Að lokinni endurtalningu höfðu orðið breytingar á atkvæðafjölda allra framboðslista í kjördæminu og hafði breytingin mikil áhrif á röðun jöfnunarsæta.

„Yfirkjörstjórn tekur fram að þær breytingar sem urðu við endurtalningu eru vegna mannlegra mistaka og harmar yfirkjörstjórn að þær hafi átt sér stað og biðst velvirðingar á þeim. En með endurtalningunni telur yfirkjörstjórn að hún hafi leiðrétt þessi mistök og þar með hafi rétt niðurstaða fengist,“ segir í greinargerðinni.

Niðurstöður í Norðvesturkjördæmi fyrir og eftir endurtalningu



„Lokatölur“ Endurtalning Breyting








Framsókn 4.443 4.448 5
Viðreisn 1.072 1.063 -9
Sjálfstæðisflokkur 3.887 3.897 10
Flokkur fólksins 1.513 1.510 -3
Sósíalistaflokkur 721 728 7
Miðflokkur 1.283 1.278 -5
Frjálsl. lýðræðisfl. 72 73 1
Píratar 1.082 1.081 -1
Samfylking 1.196 1.195 -1
Vinstri græn 1.979 1.978 -1








Auðir seðlar 394 382 -12
Aðrir ógildir 24 35 11








Samtals 17.666 17.668 2



Lítið talað um innsigli

Yfirkjörstjórn Norðvesturkjördæmis hefur verið gagnrýnd fyrir að hafa ekki innsiglað atkvæðaseðla að lokinni fyrstu talningu líkt og kosningalög kveða á um. Í greinargerðinni er lítið fjallað um meðferð atkvæðanna eftir að fyrri talningu lauk. Einungis kemur fram að kjörgögn hafi verið varðveitt í sal Hótels Borgarness þar sem talning fór fram þegar hlé var gert á fundi yfirkjörstjórnar á sunnudagsmorgun.

„Við innganginn í salinn eru öryggismyndavélar. Að lokinni endurtalningu voru kjörgögn þ.m.t. atkvæðaseðlar flutt í innsiglaðan fangaklefa á lögreglustöðinni í Borgarnesi.“

Þá er tekið fram að upptökur úr öryggismyndavélum sem sýni innganginn í salinn þar sem talning fór fram séu komnar til lögreglu.

Landskjörstjórn yfirfór greinargerðir frá öllum kjördæmum í gær og tilkynnti í kjölfarið að hún hafi ekki fengið staðfestingu frá yfirkjörstjórn Norðvesturkjördæmis um að meðferð og varðveisla kjörgagna á talningastað hafi verið fullnægjandi.

Kristín Edwald, formaður landskjörstjórnar, las upp stutta bókun í gær þar sem fram kom að skýringar frá yfirkjörstjórn Norðvesturkjördæmis væru ófullnægjandi. Næstu skref væru í höndum Alþingis sem þurfi að dæma um lögmæti niðurstaðna í kjördæminu.Vísir/Sigurjón

Ekki náð í fulltrúa Pírata

Magnús Davíð Norðdahl, oddviti Pírata í Norðvesturkjördæmi hefur ákveðið að kæra kosningarnar í kjördæminu til kjörbréfanefndar Alþingis og fara fram á að kosið verði þar að nýju.

Hefur hann meðal annars gagnrýnt að endurtalning atkvæða hafi byrjað án þess að umboðsmönnum Pírata hafi verið gert viðvart. Formaður yfirkjörstjórnar hafi svo ekki orðið við þeirri kröfu umboðsmanna að bíða með endurtalningu þar til þeir kæmu á staðinn.

Myndum af óinnsigluðum atkvæðum í sal Hótels Borgarness hefur verið eytt af Instagram.Instagram

Í greinargerðinni segir Ingi Tryggvason, formaður yfirkjörstjórnar, að hann hafi hringt í þá umboðsmenn sem náðist í þegar ákvörðun hafi verið tekin um endurtalningu.

„Vegna þessa skal sérstaklega tekið fram að vegna Pírata hringdi ég í þann aðila sem hafði afhent framboðslista þeirra á sínum tíma en hann svaraði ekki. Skömmu seinna hringdi Magnús Norðdahl, sem skipaði fyrsta sæti listans, til mín en hann hafði frétt af fyrirhugaðri endurtalningu. Hann tjáði mér að hann ætlaði að mæta en ég sagði honum að hugsanlegt væri að endurtalning yrði aðeins byrjuð þegar hann myndi koma á staðinn,“ segir í greinargerð Inga.

„Þeim umboðsmönnum sem voru mættir var gefinn kostur á að fara inn í salinn og fylgjast með endurtalningunni og Magnús fékk leyfi til að skoða með mér þá atkvæðaseðla sem voru auðir og þá sem höfðu verið úrskurðaðir ógildir.“

Fram kemur í fundargerð yfirkjörstjórnar að auk Magnúsar hafi umboðsmenn frá Flokki fólksins, Sósíalistaflokknum, Viðreisn og Vinstri grænum hafi verið viðstaddir endurtalninguna.

Fréttin hefur verið uppfærð.

Tengd skjöl


Tengdar fréttir

Íslendingar ættu ekki von á góðu í Strassbourg

Mannréttindadómstóll Evrópu telur ótækt að þingmenn greiði sjálfir atkvæði um lögmæti eigin kjörs, eins og til stendur hér á landi. Lögfræðiprófessor segir Íslendinga enn geta komið í veg fyrir að kosningin í Norðvesturkjördæmi fari til Strassbourg, en þá þurfi að hafa hraðar hendur.

Svona virka innsigli á kjörkössum

Inn­sigli á kjör­kössum hafa verið til mikillar um­ræðu síðustu daga frá því að Ingi Tryggva­son, for­maður yfir­kjör­stjórnar í Norð­vestur­kjör­dæmi, viður­kenndi í sam­tali við Vísi síðasta sunnu­dag að hann hefði ekki inn­siglað at­kvæði í kjör­dæminu eftir fyrstu talningu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.