Í sýningunni Kjarval er leitast við að draga upp mynd af Kjarval; drengnum, manninum og málaranum. Frumsýningin gekk glimrandi vel og var mikið hlegið.  

Leikarar sýningarinnar eru Þuríður Blær Jóhannsdóttir og Haraldur Ari Stefánsson. Höfundur leikgerðar og leikstjóri er Stefán Hallur Stefánsson.  Um tónlist sér Úlfur Eldjárn. 

„Listmálarinn Jóhannes Sveinsson Kjarval var ekki bara einn merkasti málari sem Íslendingar hafa átt, heldur má segja að hann hafi átt stóran þátt í að kenna þjóð sinni að meta stórbrotna náttúru landsins, náttúrunnar vegna. En hver var þessi sérkennilegi maður – og hvaðan kom hann?“ segir um sýninguna.  

„Listin sjálf er sömuleiðis í brennidepli; hvernig hún er allt í kringum okkur og hefur áhrif á lífið alla daga, við horfum á listina og ef við erum heppin þá horfir hún til baka. Jóhannes Kjarval batt bagga sína ekki sömu hnútum og samferðamenn en kenndi okkur að líta umhverfið nýjum augum og sjá listina í hinu stórbrotna jafnt sem hinu hversdagslega – í hrikalegu hrauni en líka í mygluðum flatkökum.“

Í albúminu hér fyrir neðan má sjá fleiri myndir frá frumsýningu Kjarval.