Viðskipti innlent

Laxeldi á bak við helming starfa á stærsta netaverkstæði Austfjarða

Kristján Már Unnarsson skrifar
Hrafn Bjarnason er gæða- og verkefnisstjóri hjá Egersund á Eskifirði.
Hrafn Bjarnason er gæða- og verkefnisstjóri hjá Egersund á Eskifirði. Arnar Halldórsson

Þjónusta við laxeldi hefur á skömmum tíma vaxið upp í að verða helmingur af starfsemi stærsta netaverkstæðis Austfjarða. Þessi nýjasta viðbót kom inn á sama tíma og hrun varð í loðnuveiðum.

Í fréttum Stöðvar 2 var fjallað um Egersund Ísland á Eskifirði. Upphaflega var það Aðalsteinn Jónsson, Alli ríki, sem stofnaði netaverkstæðið fyrir aldarfjórðungi til að sinna eigin skipaflota. Eskja seldi það síðan og er fyrirtækið núna í eigu framkvæmdastjórans Stefáns Ingvarssonar og Egersund Group í Noregi.

Lengst af þjónaði fyrirtækið einkum uppsjávarveiðum og þá var netaverkstæðið fullt af flottrollum og loðnunótum. Í vinnusal Egersund má núna merkja nýjasta vaxtarsprotann, fiskeldið.

Laxeldispoki úr sjókví hífður upp í porti netaverkstæðis Egersund.Arnar Halldórsson

Laxeldispokar úr sjókvíum eru teknir í land eftir hverja kynslóð, þvegnir og skoðaðir ítarlega og eftir atvikum endurnýjaðir og litaðir. Hjá Egersund var reist bæði litunarhús og þvottastöð til að mæta þessum nýju verkefnum.

„Heildarfjárfestingin í kringum þessa viðbót vegna laxeldisins hleypur einhversstaðar á milli 300 og 400 milljónir. Svo það er töluvert mikil vinna sem hefur fylgt því, í uppbyggingu, fyrir iðnaðarmenn og aðra í samfélaginu,“ segir Hrafn Bjarnason, gæða- og verkefnisstjóri.

Fyrirtækið sinnir jafnframt tækniþjónustu fyrir laxeldið, eins og við fóðurpramma. Fyrir samfélagið hefur þetta mikla þýðingu því Egersund er einn af stærri vinnustöðum á Eskifirði.

„Við erum sextán til sautján, eins og staðan er núna. Þar af eru með beinum hætti að minnsta kosti átta til níu manns sem vinna beint við laxeldið,“ segir Hrafn.

Starfsmenn Egersund gera við laxeldispoka.Arnar Halldórsson

Þessi viðbót kom inn á sama tíma og loðnan brást.

„Loðnuvertíðin hefur staðið undir talsvert mikilli vinnu hjá okkur á hverju ári. Laxeldið kemur inn og má segja jafni ástandið. Þannig að við urðum ekki fyrir vinnutapi.“

Svo vonast þeir auðvitað eftir góðri loðnuvertíð í vetur.

„En með aukningu í loðnukvóta þá munum við þurfa að bæta við okkur talsvert af starfsmönnum. Og þá munu þessir átta starfsmenn sem vinna í laxeldinu vera hrein viðbót við það sem áður var,“ segir Hrafn.

Hér má sjá frétt Stöðvar 2:


Tengdar fréttir

Smíðar sjókvíar og báta á Djúpavogi fyrir fiskeldi

Bátasmiðja á Djúpavogi smíðar sjókvíar og báta fyrir fiskeldi. Framkvæmdastjórinn segir marga ekki átta sig á hve sprotar geta farið víða og hve störfin eru orðin mörg sem tengjast fiskeldinu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
BRIM
7,27
22
295.790
SVN
6,45
49
478.444
ORIGO
5,93
11
19.565
KVIKA
5,63
53
660.290
SJOVA
4,44
23
167.585

Mesta lækkun dagsins


Engar lækkanir skráðar í dag
Velkomin á Vísi. Þessi vefur notar vafrakökur. Sjá nánar.