Lífið

Oddvitaáskorunin: Dansdrottning fyrir pólitíkina

Samúel Karl Ólason skrifar
Þórhildur Sunna og eiginmaður hennar, Rafal Orpel, á hátíðlegri stund er sonur þeirra hlaut nafn sitt: Antoni Örn Orpel.
Þórhildur Sunna og eiginmaður hennar, Rafal Orpel, á hátíðlegri stund er sonur þeirra hlaut nafn sitt: Antoni Örn Orpel.

Vísir stendur fyrir Oddvitaáskoruninni 2021 þar sem skorað er á oddvita allra flokka í kjördæmum um land allt að taka þátt. Áskorunin felur í sér stutta kynningu og að svara nokkrum léttum spurningum.

Þórhildur Sunna Ævarsdóttir leiðir lista Pírata í Suðvesturkjördæmi í kosningunum.

Hér má sjá Þórhildi Sunnu segja frá því af hverju hún sé Pírati. Þar kemur einnig fram að hún sé „dansdrottning“ og hafi mjög gaman af danstónlist.

Klippa: Oddvitaáskorun - Þórhildur Sunna Ævarsdóttir

Hver er fallegasti staðurinn á Íslandi?

Látrabjarg.

Hvað færðu þér í bragðaref?

Snickers og jarðaber.

Uppáhalds bók?

Uppáhalds söguheimurinn minn er þríleikur Philip Pullmann um myrku öflin (e. His Dark Materials. Ég á mjög erfitt með að gera upp á milli þeirra þriggja. Rétt fyrir síðustu kosningar gaf Philip Pullman út fyrstu bókina í nýjum þríleik í sama heimi (Bækur Duftsins) sem ég hlustaði á í hljóðbók milli funda í kosningabaráttunni þar sem ég gat hreinlega ekki beðið þar til eftir kosningar. Bók númer tvö er komin út og ég krossa bara fingur að sú þriðja komi ekki út fyrir þessar kosningar því ég hef engan tíma til að einu sinni hlusta á hana í þetta skiptið!

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Dreymir með Landi og Sonum.

Hvar á Íslandi myndir þú helst vilja búa? (Ekki í þínu kjördæmi)

Í Melasveit í Skilmannahreppi þar sem amma og afi bjuggu þegar ég var lítil. Sælureitur með góðum minningum.

Dundaðir þú þér við eitthvað á tímum Covid og samkomutakmarkana? Hámhorf eða nýtt áhugamál, sem dæmi.

Ég tók bara allan COVID-fjölskyldupakkann með trompi. Ég gekk í hjónaband, eignaðist barn og hund.

Hvað tekur þú í bekk?

Ég tek Bjarna Ben í bekk.

Tilfinningarík og íhugul Þórhildur Sunna á unglingsárum.

Burstar þú tennurnar fyrir eða eftir morgunmat?

Fyrir.

Draumastarfið? (Fyrir utan þingsetu)

Algjör klisja: Mannréttindafulltrúi Sameinuðu þjóðanna eða Evrópuráðsins.

Hvað myndir þú segja við Kim Jong Un, einræðisherra Norður-Kóreu, ef þú myndir hitta hann í einrúmi?

Ég myndi spyrja hann: „Er það satt að þú kúkir ekki?“

Uppáhalds tónlistarmaður?

Björk, frábær tónlistarmaður og ógeðslega svöl.

Besti fimmaurabrandarinn?

Ég kann nokkra fimmaurabrandara um kommúnisma en þeir myndu missa Marx.

Ein sterkasta minningin úr æsku?

Að fara í reiðtúra með afa heitnum í Melasveitinni.

Hver er fyrirmynd þín í pólitík?

Alexandria Ocasio-Cortez, Halldóra Mogensen, Jóhanna Sigurðardóttir, Sigríður Ingibjörg Ingadóttir, Jacinda Arden, Angela Merkel og Jón Gnarr.

Besta íslenska Eurovision-lagið?

Minn hinsti dans, Páll Óskar

Besta frí sem þú hefur farið í?

Fyrsta fjölskylduferðin okkar í sumar þar sem drengurinn okkar Rafals fékk að hitta ömmu sína og afa, langömmu og annað skyldfólk í Póllandi í fyrsta sinn.

Uppáhalds þynnkumatur?

Dirty Burger og Pistasíusjeik.

Hve oft hefur þú farið að sjá eldgosið?

Ég hef ekki farið ennþá! Plís ekki taka af mér ríkisborgararéttinn!

Uppáhalds Fóstbræðraatriði?

Konan sem kunni bara að elda bjúgu.

Uppáhalds uppátækið frá framhaldsskólaárunum?

Að hætta í MR og fara í FB, það var gott múv.

Rómantískasta uppátækið?

Þegar ég hringdi í Ingu Auðbjörgu vinkonu mína og bað hana um að koma daginn eftir til þess að gefa okkur Rafal saman í garðinum heima á þriggja ára sambandsafmælinu okkar. Við gátum bara ekki beðið lengur eftir allar covid-frestanirnar.






Fleiri fréttir

Sjá meira


×