Sport

Klara Bjartmarz farin í leyfi

Birgir Olgeirsson og Kolbeinn Tumi Daðason skrifa
Klara Bjartmarz hefur starfað fyrir KSÍ undanfarin 27 ár en sem framkvæmdastjóri síðan árið 2015.
Klara Bjartmarz hefur starfað fyrir KSÍ undanfarin 27 ár en sem framkvæmdastjóri síðan árið 2015. Vísir/Egill

Klara Bjartmarz, framkvæmdastjóri Knattspyrnusambands Íslands, er farin í leyfi frá störfum. Þetta staðfestir Óskar Örn Guðbrandsson á samskiptadeild KSÍ í samtali við fréttastofu. Hann vísaði á fulltrúa stjórnar varðandi nánari upplýsingar.

Stjórn Íslensks toppfótbolta, samtaka félaga í efstu deildum, hafði kallað eftir því að Klara hætti samhliða stjórn KSÍ til að auka traust knattspyrnuhreyfingarinnar og almennings gagnvart sambandinu.

Undir þetta hafa Hanna Björg Vilhjálmsdóttir kynjafræðikennari og aktívistahópurinn Öfgar tekið síðustu daga.

Klara sagðist á mánudagskvöld ætla að halda áfram störfum sem framkvæmdastjóri. Ekkert náðist í hana í gær og ekki hefur náðst í hana við vinnslu þessarar fréttar.

Ástæða leyfis ekki gefin upp

Gísli Gíslason, annar tveggja varaformanna KSÍ, segist í samtali við fréttastofu ekki ætla að gefa upp ástæðu leyfis Klöru.

„En það undrast kannski engan í ljósi aðstæðna,“ segir Gísli.

Hann segir ekki búið að ákveða hversu lengi leyfið mun standa. „Við eigum eftir að ræða það við hana.“

Birkir Sveinsson, sviðsstjóri KSÍ mun taka við skyldum Klöru á meðan hún er í leyfi.

Margt er á döfinni hjá KSÍ vegna landsleikja karlalandsliðsins. Gísli hefur fulla trú á að starfsfólk KSÍ muni leysa það verkefni án Klöru.

„Það er harðsnúið lið innan veggja KSÍ sem mun leysa þessi verkefni með sóma eins og önnur,“ segir Gísli.

Óskar Örn sagði í stuttu samtali við fréttastofu að starfsmenn sambandsins væru á fullu að skipuleggja landsleikina þrjá sem fram undan eru. Karlaliðið mætir Rúmeníu, Norður-Makedóníu og Þýskalandi í þriggja leikja törn á sex dögum á Laugardalsvelli.

Landsliðsmaður greiddi miskabætur 

Guðni Bergsson, formaður KSÍ, ákvað um helgina að stíga til hliðar sem formaður KSÍ. Stjórn KSÍ ætlaði fyrst að sitja áfram en ákvað í framhaldinu, eftir mikinn þrýsting, að stíga til hliðar og boða til aukaþings eftir fjórar vikur þar sem ný stjórn verður kosin.

Viðbrögð knattspyrnusambandsins við ásökunum um ofbeldi af hendi landsliðsmanna urðu til þess að formaður og stjórnin vék. Stóð þar upp úr að formaðurinn Guðni sagðist í Kastljósviðtali ekkert mál er tengdist kynferðisofbeldi hafa komið inn á borð sambandsins. Í framhaldinu steig Þórhildur Gyða Arnarsdóttir fram og greindi frá því að Kolbeinn Sigþórsson hefði greitt henni og annarri konu miskabætur árið 2018 vegna kynferðisofbeldis haustið 2017.

Guðni útskýrði að hann hefði misminnt og talið að um ofbeldismál hefði verið að ræða. Baðst hann afsökunar á þeim misskilningi.

Á mánudagskvöld greindi Klara frá því að hún hefði verið meðvituð um ábendingu um hópnauðgun á borði sambandsins í sumar. Aðspurð hvort mál Þórhildar væri eina slíka málið sem komið hefði á borð sambandsins svaraði hún:

„Já og nei, ég náttúrulega heyrði í sumar af brotum, sem hefur verið … já semsagt af þessari hópnauðgun og það mál var líka flutt í ferli,“ sagði Klara í samtali við RÚV á mánudagskvöld. 

Fréttin hefur verið uppfærð.


Tengdar fréttir

Fengu ó­form­lega til­kynningu um annað hóp­nauðgunar­mál

Knattspyrnusambandi Íslands barst óformleg tilkynning um annað hópnauðgunarmál síðasta sunnudag. Eftir því sem sambandið kemst næst eru meintir gerendur í því máli ekki í landsliðshópnum fyrir leikinn við Rúmeníu á fimmtudag.

Stjórn KSÍ mun ekki víkja Klöru frá störfum

Klara Bjartmarz, framkvæmdastjóri KSÍ, mun að öllu óbreyttu sinna störfum sínum fyrir sambandið áfram næstu mánuði. Hún ætlar ekki að stíga frá borði og sitjandi stjórn ætlar ekki að víkja henni frá störfum.




Fleiri fréttir

Sjá meira


×