Atvinnulíf

Leiðir til að lokka starfsfólk aftur á vinnustaðinn

Rakel Sveinsdóttir skrifar
Vinnustaðir þurfa að vera skýrir með svör um það hvers vegna fólk ætti að snúa aftur úr fjarvinnu. Því ef það er að afkasta vel í fjarvinnu og rúmlega það, hvers vegna ætti það þá að fara að mæta aftur á vinnustaðinn?
Vinnustaðir þurfa að vera skýrir með svör um það hvers vegna fólk ætti að snúa aftur úr fjarvinnu. Því ef það er að afkasta vel í fjarvinnu og rúmlega það, hvers vegna ætti það þá að fara að mæta aftur á vinnustaðinn? Vísir/Getty

Sitt sýnist hverjum um ágæti fjarvinnu. Sumir hreinlega elska þessa nýju veröld á meðan aðrir óska þess heitast að allt verði eins og það var fyrir Covid. Þá sérstaklega eru vinnuveitendur margir sagðir uggandi yfir því hversu áhugalaust fólk er um að mæta aftur til vinnu á vinnustaðinn sjálfan!

Nýverið bauð til dæmis fyrirtæki í Kísildal einum starfsmanni gull og græna skóga fyrir það eitt að fara að mæta aftur til vinnu í stað þess að vinna í fjarvinnu. 

Tilboðið hljóðaði upp á hálfa milljón Bandaríkjadala í hlutabréfabónus, hvorki meira né minna.

Viðkomandi sagði Nei.

Það geta reyndar verið margar ástæður fyrir því að fólk kýs að starfa áfram í fjarvinnu. Hluti er auðvitað smithættan nú þegar Delta er enn á sveimi. Að lágmarki þurfa vinnuveitendur því að fullvissa starfsfólk um að allar bestu sóttvarnarráðstafanir eru gerðar á vinnustaðnum ef ætlunin er að fá fólk til að snúa til baka.

Í grein á vefsíðunni Fastcompany eru gefin nokkur ráð sem gætu hvatt fólk til að mæta aftur á vinnustaðinn. 

Við skulum aðeins rýna í nokkrar leiðir:

1. Svaraðu spurningunni Hvers vegna?

Margir í fjarvinnu segjast afkasta meira en áður og spara sér auk þess tíma við ferðir fram og til baka og svo framvegis. Allur sveigjanleiki vinnunnar hefur aukist.

Vinnuveitendur sem vilja fá fólk til að snúa til baka á vinnustaðinn þurfa að vera skýrir í svörum um það hvers vegna þeir vilja að fólk komi aftur. 

Því ef fólk er að skila sínu og jafnvel rúmlega það miðað við áður, hvers vegna ætti fólk að koma aftur?

Til viðbótar við skýr svör um af hverju, er mælt með því að vinnuveitendur láti vita að það væri þakklátt fyrir það að sjá fólkið oftar á vinnustaðnum. Þakklæti er jú eitthvað sem almennt virkar alltaf vel og er ómissandi þáttur í góðum samskiptum og nærveru.

Að efla liðsheildina er líka mikilvægur þáttur. Fólk þarf að upplifa það markmið að ætlunin sé að auka á allt sem einkennir góða teymisvinnu. Þessi skilaboð mega samt ekki vera orðin tóm og því þurfa vinnuveitendur að láta vita af því fyrirfram, hvernig ætlunin er að vinna að þessu.

2. Sveigjanleikinn á ekki að hverfa

Margir vinnustaðir hafa sett sér það markmið að fá fólk að hluta til aftur til vinnu en að fjarvinna verði áfram hluti vinnuvikunnar.

Til þess að blandað fyrirkomulag takist þarf starfsfólk að upplifa staðbundna vinnu sem eftirsóknarverðan valkost í samanburði við fjarvinnuna. 

Hér er til dæmis mælt með því að vinnustaðir auki við fræðslu eða þjálfun af ýmsum toga þannig að fólk sjái fyrir sér að með því að mæta á vinnustaðinn hluta úr vinnunni, þá sé það að læra eitthvað nýtt eða verða betri í einhverju, sem það annars myndi missa af ef það er í fjarvinnu alla daga.

Eitt ráð í þessu er að kalla eftir hugmyndum frá starfsfólki um það hvað fólki fyndist spennandi að læra eða þjálfast betur í.

3. Að efla félagshlutann

Þótt fjarvinna sé vinsæl er útundanótti, einangrun og einmanaleiki þó einnig staðreynd. Til þess að sporna við þessu er mikilvægt að tryggja að samstarfsfólk hittist líka reglulega.

Fyrir marga gæti félagshlutinn verið rétta gulrótin. 

Vinnustaðir þurfa því að huga að því hvað sé hægt að gera til að auka á félagshlutann í vinnunni og þá þannig að fólk upplifi félagshlutann þegar það mætir á vinnustaðinn.

4. Þolinmæði

Síðan er það blessuð þolinmæðin sem þrautina vinnur alla. Við þurfum öll að muna að Covid er ekki yfirstaðið og lífið er ekki orðið eðlilegt að nýju fyrir neinn.

Þetta getur þá þýtt að þótt fólk sé ekki endilega mjög hrætt við Covid er það hreinlega ekki tilbúið í augnablikinu til að taka ákvarðanir um að koma aftur á staðinn. 

Sama hvaða leiðir eða gulrætur eru í boði. 

En það er svo sem ekkert sem segir að það gæti ekki mögulega breyst síðar. Til dæmis þannig að fólk yrði tilbúnara til að festa sig í blönduðu fyrirkomulagi: Fjarvinna og staðbundin.


Tengdar fréttir

Áhyggjufullir stjórnendur: Fjórar mýtur um fjarvinnu

Hið svo kallaða „hybrid“ vinnufyrirkomulag er orðið að veruleika og ljóst að til framtíðar verða æ fleiri störf unnin í blönduðu fyrirkomulagi: Í fjarvinnu að hluta en á vinnustaðnum að hluta.

Ólík karaktereinkenni að koma betur í ljós eftir Covid

Nú þegar rúmt ár er liðið frá því að öllu var skellt í lás og fjarvinna varð fyrir alvöru hluti af raunverulegu lífi hjá mörgum, er áhugavert að velta því fyrir sér hvað hefur gerst í millitíðinni. Eða mega vinnustaðir búast við því að allt fólk snúi til baka til vinnu eftir bólusetningu og þá verði allt eins og áður?

„Við þurfum að vinna gegn útundanóttanum“

„Ég vinn meðal annars við að aðstoða og styðja fólk í að reyna að ná utan um þær óvelkomnu breytingar sem hafa orðið í Covid faraldrinum,“ segir Þórkatla Aðalsteinsdóttir sálfræðingur hjá Líf og sál og bendir á að vinnustaðir þurfi að huga vel að þeim áhrifum sem Covid er að hafa á fólk, því þeim áhrifum muni ekki ljúka með bólusetningum. 

Starfsfólk aldrei ánægðara en eftir Covid

„Starfsfólk hefur aldrei verið ánægðara í starfi, það upplifir fleiri tækifæri til að þróast í starfi og það fær meira hrós og endurgjöf en áður,“ segir Dröfn Guðmundsdóttir framkvæmdastjóri mannauðsviðssviðs Origo um niðurstöður vinnustaðakönnunar sem Gallup framkvæmdi fyrir Origo í desember síðastliðnum.

Mælingar fjarvinnu í Covid: Afköst aukast en ekki vöðvabólga

„Eitt af því sem að við héldum að myndi gerast núna í nóvember, væri að vöðvabólga og bakverkir myndu aukast, þar sem fólk væri í meira mæli að vinna heima og sumir hugsanlega ekki við kjöraðstæður. En við erum hvorki að sjá aukningu á bakverkjum eða vöðvabólgu frá því í apríl,“ segir Tómas Bjarnason sviðsstjóri mannauðsrannsókna og ráðgjafar Gallup.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.