Að læra af fimm mis­tökum Steve Jobs

Einn þeirra sem svo sannarlega áttu sína skrautlegu sögu var Steve Jobs, fyrrum forstjóri Apple. Steve lést úr krabbameini árið 2011, þá aðeins 56 ára. Heimsfrægur með meiru þegar hann lést enda veröldin þá þegar búin að kynnast þessum helstu vörum: makkatölvunum, iPhone, iPads, iPods og svo framvegis.

Starfsframi og vegferð Jobs var þó langt frá því að vera sléttur og greiður vegur. Í samantekt sem FastCompany birti á dögunum segir að þeir eiginleikar sem gerðu hann einstakan – næstum eyðilögðu Apple á fyrstu árum fyrirtækisins: Þessi eilífa fullkomnunarárátta og ósveigjanleiki til að miðla málum.

Jobs fannst hann í raun alltaf hafa rétt fyrir sér og seinna sagði hann að oft hefði hann mátt una vel við það sem gott var, frekar en að stefna alltaf að því að allt yrði best eða fullkomið.

Í þó nokkurn tíma var Jobs nánast útlægur frá Kísildal. Sat á lítilli skrifstofu handan við horn Apple-höfuðstöðvanna, skrifstofu sem var oftast kölluð Síbería. Stjórnendur og samstarfsmenn voru sagðir hættir að hringja í hann, sem gerði Jobs bæði leiðan og einmana.

En mögulega var þetta leiðin til að læra af mistökunum. Sjá betur hver þau voru og fá tækifæri til að bæta um betur.

Í fyrrnefndri grein FastCompany eru eftirfarandi fimm mistök sögð þau atriði sem margir gætu lært af, en þau eru:

„Ég ER stjórnin,“ sagði Jobs eitt sinn við stjórnanda í Apple, þá sjálfur stjórnarformaður, en þetta eru fyrstu mistök Jobs sem tilgreind eru: Hann leit á sjálfan sig sem aðal í öllu, miðju allra ákvarðana.

Hann hannaði fyrir eigin smekk frekar en markaðinn eru mistök sem tilgreind eru númer tvö. Sem þýddi að Macintosh-tölvan í árdaga var dýr, sérhæfð og sló í gegn hjá ákveðnum hópi og síðan: Búið. Eða svo gott sem… Þó nokkur tími leið þar til fyrirtækið náði sér á strik.

Þriðju mistökin eru að kenna öðrum um. Til dæmis að fara af stað með vörusölu áður en varan væri endanlega tilbúin en kenna starfsfólki síðan um að eitthvað væri ekki orðið nógu gott eða að ganga vel.

Fjórðu mistökin eru síðan þau að geta ekki sleppt takinu á því sem var ekki að ganga upp. Eitthvað sem margir frumkvöðlar viðurkenna að geti verið erfitt; halda áfram að rembast eins og rjúpan við staur í of langan tíma. Afleiðingarnar urðu meðal annars þær að fókus Apple varð óskýr. Svo óskýr reyndar að eitt árið gaf fyrirtækið út meira en 70 vörur á einu ári. Þar á meðal fartölvu sem kviknaði í og þurfti að innkalla.

Þá átti Jobs það til að koma fram við fólk af hroka, líta á það sem hindranir og jafnvel uppnefna það eða baktala. Sögur eru því um fundi sem hann hunsaði að mæta, þótt þeir væru á vegum stærstu fjárfesta Apple, að segja verslanir stærstu dreifingaraðila sinna ljótar eða að tala um að fólk væri hálfvitar sem ekki veldi vörur Apple.

Eins og frægt er orðið yfirgaf Jobs fyrirtækið um tíma, sneri síðan aftur árið 1997 og tókst þá að forða því frá gjaldþroti.

Í millitíðinni hafði hann samt lært heilmargt.

Af sínum eigin mistökum.

Til dæmis skar Jobs niður um 70% af vörulínu Apple þegar hann sneri til baka og sýndi líka í verki sem stjórnandi að hann valdi frekar sínar orrustur en að berjast í öllu.

Skapsveiflur og reiðiköst virtust líka hafa dofnað verulega og eftir tólf ár af niðurlægingu sneri Jobs aftur til Apple sem stjórnandi sem fór að hlusta á stjórnendur og byggja upp sterk teymi. Sem dæmi má nefna starfaði sama stjórnendateymið hjá honum í Apple í átta ár.

Í dag er Jobs minnst sem mikils snillings og án efa eins stærsta og merkasta nafnið í sögubókum tækniþróunar á síðustu öld.

Jobs var þó jafn breyskur og við öll hin. Gerði sín mistök en lærði af þeim. Eitthvað sem allir ættu að taka sér til fyrirmyndar.