Atvinnulíf

Starfsfólk aldrei ánægðara en eftir Covid

Rakel Sveinsdóttir skrifar
Dröfn Guðmundsdóttir.
Dröfn Guðmundsdóttir. Vísir/Vilhelm

„Starfsfólk hefur aldrei verið ánægðara í starfi, það upplifir fleiri tækifæri til að þróast í starfi og það fær meira hrós og endurgjöf en áður,“ segir Dröfn Guðmundsdóttir framkvæmdastjóri mannauðsviðssviðs Origo um niðurstöður vinnustaðakönnunar sem Gallup framkvæmdi fyrir Origo í desember síðastliðnum.

Dröfn segir niðurstöðurnar ánægjulegar, ekki síst vegna þess að könnunin var framkvæmd á tímum þröngra samkomutakmarkana og á tíma þar sem fréttir af fjölgun smita voru tíðar í fjölmiðlum. „Við áttum því alveg eins von á að þau samfélagsáhrif gætu haft neikvæð áhrif á líðan í vinnunni. En þvert á móti, þá erum við að sjá þessa miklu starfsánægju sem við erum gríðarlega stolt af,“ segir Dröfn.

Í dag og í gær er fjallað um áherslur í mannauðsmálum í kjölfar Covid. Hér er dæmi um hvernig áherslur eru að breytast á rótgrónum vinnustað.

Endurhanna húsnæði og fleira

Hjá Origo starfa um 450 manns og segir Dröfn fyrirtækið framkvæma sínar eigin vinnustaðakannanir mánaðarlega. Því til viðbótar, framkvæmir Gallup stærri vinnustaðagreiningu í nóvember ár hvert.

„Við höfum því margra ára samanburð og vorum svakalega stolt þegar við fengum niðurstöður frá Gallup í desember síðastliðinn sem leiddu í ljós að við vorum að hækka umtalsvert á öllum lykil mælikvörðum,“ segir Dröfn.

Að mati Drafnar skýrast niðurstöðurnar ekki síst af þeim áherslum sem lagðar voru í upphafi heimsfaraldurs.

Við höfum lagt höfuðáherslu á lausnamiðað hugarfar og traust til starfsfólks á þessum tímum heimsfaraldurs og það er að skila sér. Stjórnendur hafa aukið samskipti og upplýsingagjöf til starfsmanna, en við höfum flest unnið að heiman, til að vernda starfsfólk og starfsemina og tryggja sóttvarnir.“

Þá sýna niðurstöður kannana að um þriðjungur starfsfólks Origo kýs að vinna áfram í fjarvinnu.

„Aukin fjarvinna er komin til að vera, þrátt fyrir tilslakanir á sóttvörnum og bólusetningu,“ segir Dröfn og bætir við:

„Við förum ekki til baka. Við erum komin í nýjan veruleika. Ég held að starfsfólk muni velja sér vinnustaði sem bjóði upp á sveigjanleikann sem felst í blöndu af fjarvinnu og vinnu á vinnustað.

Það hefur ekki aðeins sýnt sig að fólk upplifir meira traust og sjálfstæði í starfi í fjarvinnu, heldur gengur því betur að sameina fjölskyldu og vinnu.

Við höfum líka séð mælanleg jákvæð áhrif á kolefnisfótspor starfsmanna, sem vinna heima og spara ferðir til og frá vinnu. Svo ávinningurinn er margvíslegur að bjóða upp á blandað starfsumhverfi.“

Sem dæmi um hvernig breyttar áherslur eru að kalla á aðrar breytingar hjá vinnustaðnum, nefnir Dröfn húsnæðismálin.

Við erum því um þessar mundir að skipuleggja endurhönnun á húsnæði og aðstöðu starfsmanna til að mæta nýjum veruleika í blönduðu starfsumhverfi. Nýr veruleiki kallar á breytt skipulag vinnusvæða með færri skrifborðum, fjölbreyttari vinnurýmum og tæknilausnum sem styðja við útfærsluna.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.