Lífið

Bjóða ungu fólki á Rómeó og Júlíu festival

Sylvía Rut Sigfúsdóttir skrifar
Rómeó og Júlía verður frumsýnt í Borgarleikhúsinu í september.
Rómeó og Júlía verður frumsýnt í Borgarleikhúsinu í september. Þjóðleikhúsið

Þjóðleikhúsið mun standa fyrir einstakri leikhúshátíð fyrir unga fólkið í tengslum við frumsýningu á Rómeó og Júlíu í leikstjórn Þorleifs Arnar Arnarssonar á Stóra sviðinu þann 4. september.

Ungu fólki á menntaskólaaldri, sem er fætt 2002-2005, verður boðið á fyrstu sýningar verksins. Samkvæmt tilkynningu frá Þjóðleikhúsinu birtist verkið hér í nýrri þýðingu og með grípandi tónlist, í útfærslu sem hrífur áhorfandann með inn í heillandi og hættulegan heim. Þjóðleikhúsið mun bjóða ungu fólk á menntaskólaaldri á fimm fyrstu sýningarnar. 

Hér verður hægt að tryggja sér miða 27. ágúst kl. 12:00 þegar opnað verður fyrir miðapantanir. Fyrstir koma fyrstir fá. Rómeó og Júlíu-hátíðin stendur yfir dagana 4. – 10. september og er fyrir gesti sem fæddir eru 2002-2005. Vinir og vinahópar, geta skráð sig saman, allt að 10 manns í hóp.

Salka Valsdóttir og Ebba KatrínÞjóðleikhúsið

Hægt verður að tryggja sér miða á sýningar eftirfarandi daga: 

  • lau 4. sept kl. 18:30
  • sun 5. sept kl. 18:30
  • mið 8. sept kl. 18:30
  • fim 9. sept kl. 18:30
  • fös 10. sept kl. 18.30

Auk sýninganna verða viðburðir á Stóra sviðinu og plötusnúðarnir Young Nasareth, Dóra Júlía og Unnur Birna munu sjá um fjörið í forsal fyrir og eftir sýningar. Dagskrá alla þessa daga verður með svipuðum hætti:

  • Húsið opnar kl. 18.30 með plötusnúðum
  • Viðburður hefst á sviðinu kl. 19
  • Leiksýningin hefst kl. 20
  • Plötusnúðar spila áfram eftir sýningu

Sigurbjartur Sturla Atlason, einnig þekktur sem tónlistarmaðurinn Sturla Atlas, og Ebba Katrín Finnsdóttir fara með hlutverk elskendanna frægu og tónlistarkonurnar Salka Valsdóttir og Bríet Ísis Elfar sjá um lifandi tónlistarflutning í sýningunni. 

Hér fyrir neðan má hlusta á fyrsta lagið sem kynnt var úr sýningunni, Heiti king. 

Rómeó og Júlía er saga af sannri ást en um leið ástsýki og ungæðishætti. Í forgrunni verður mögnuð barátta ungrar konu gegn yfirþyrmandi feðraveldi. Fegurstu sögurnar geta sprottið upp úr hræðilegustu aðstæðunum. Þorleifur Örn Arnarsson er einn fremsti leikstjóri Evrópu og einn listrænna stjórnenda hins virta leikhúss Volksbühne. Hann á að baki geysivinsælar sýningar á Íslandi á borð við Engla alheimsins og Njálu. Nú hefur hann gengið til liðs við nýtt listrænt teymi Þjóðleikhússins þar sem hann mun starfa á næstu árum.


Tengdar fréttir

Auður tekur ekki þátt í upp­setningu Rómeó og Júlíu

Tónlistarmaðurinn Auðunn Lúthersson, betur þekktur sem Auður, mun ekki taka þátt í uppsetningu leikverksins Rómeó og Júlíu sem mun verða sýnt í Þjóðleikhúsinu næsta vetur en hann tilkynnti í gær að hann muni draga sig í hlé. Þetta staðfestir Magnús Geir Þórðarson, Þjóðleikhússtjóri, í samtali við fréttastofu.

Júlía er fundin en nú hefst leitin að Rómeó

Þjóðleikhúsið undirbýr nú uppsetningu á Rómeó og Júlíu eftir William Shakespeare í leikstjórn Þorleifs Arnar Arnarssonar. Sýningin verður frumsýnd í byrjun mars 2021.






Fleiri fréttir

Sjá meira


×