Golf

Tvær í forystu þegar keppni er hálfnuð - þeirri bestu fataðist flugið

Valur Páll Eiríksson skrifar
Toppkona heimslistans og Ólympíumeistarinn Nelly Korda vill eflaust bæta upp fyrir strembinn hring gærdagsins.
Toppkona heimslistans og Ólympíumeistarinn Nelly Korda vill eflaust bæta upp fyrir strembinn hring gærdagsins. Kevin C. Cox/Getty Images

Spennan er mikil á toppnum á Opna breska mótinu í golfi sem fram fer á Carnoustie-vellinum í Skotlandi. Þriðji hringur mótsins hefst í dag.

Hin bandaríska Mina Harigae var á meðal þeirra sem lék best á öðrum hring mótsins í gær, á 67 höggum eða fimm höggum undir pari vallar, sem kom henni í forystu ásamt hinni ensku Georgiu Hall. Báðar eru þær á sjö höggum undir pari í heildina en Hall lék á 69 höggum í gær.

Nelly Korda, sem er efst á heimslistanum, deildi forystunni eftir fyrsta hringinn en átti strembinn annan hring. Henni gekk bölvanlega á flötunum þar sem púttinn vildu hreinlega ekki niður og lauk hún hringnum á höggi yfir pari. Korda hefur farið mikinn í ár þar sem hún vann PGA-meistaramótið í júní og hlaut Ólympíugull í Japan á dögunum.

Hún er á fjórum undir pari í heildina, jöfn fimm öðrum kylfingum í 12.-17. sæti, þar á meðal hinni sænsku Madelene Sagström sem hlaut sama skor og Korda á báðum hringjum.

Sei-Young Kim frá Suður-Kóreu var jöfn þeim tveimur á toppnum eftir fyrsta hringinn en henni gekk betur en þeim Korda og Sagström í gær. Hún fór hringinn á höggi undir pari, og er því önnur á sex undir parinu í heildina, höggi á eftir efstu konum. Lizette Salas frá Bandaríkjunum er henni jöfn í 3.-4. sæti.

Þar á eftir koma sjö kylfingar á fimm höggum undir pari, aðeins tveimur frá toppnum, og því ljóst að keppnin verður hörð á toppnum er þriðji hringur mótsins verður leikinn í dag.

Keppni á Opna breska hefst klukkan 10:00 í dag og verður í beinni á Stöð 2 Golf.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.