Erlent

Íbúar Kabúl óttaslegnir

Heimir Már Pétursson skrifar
Afganir örvæntingafullir um að komast á brott úr Kabúl í gær. Ástandið þar er langt í frá öruggt, einkum fyrir þá sem hafa verið hliðhollir stjórninni undanfarin ár.
Afganir örvæntingafullir um að komast á brott úr Kabúl í gær. Ástandið þar er langt í frá öruggt, einkum fyrir þá sem hafa verið hliðhollir stjórninni undanfarin ár. Paula Bronstein/Getty Images

Þótt Talibanar hafi gefið út almenna sakaruppgjöf í Afganistan og skorað á fólk að halda til vinnu eru margir íbúar höfuðborgarinnar Kabúl óttaslegnir og halda sig heima.

Kona sem BBC ræðir við og hefur á undanförnum árum talað á ýmsum ráðstefnum þorir ekki út úr húsi og segir Talibana hafa ráðist á fólk á götum úti með barsmíðum og þeir geri húsleit hér og þar. 

Þá komi þeir í veg fyrir að almennir íbúar Kabúl komist inn á flugvöllinn til að fara úr landi. Margar flugvélar ætlaðar flóttafólki fari því hálf tómar þaðan. 

Fyrsta flugvélin með flóttamenn frá Afganistan lenti í Madrid á Spáni í morgun. Spánverjar hafa ákveðið að taka á móti fimm hundruð manns en fyrir utan eigið starfsfólk í sendiráði Spánar í Kabúl eru það aðallega afganskir starfsmenn sendiráðsins og fjölskyldur þeirra. Þá komu áttatíu og fjórir flóttamenn til Danmerkur í gær.

Joe Biden Bandaríkjaforseti sagði í viðtali við ABC fréttastofuna í gær að bandarískir hermenn kunni að vera eitthvað lengur í Afganistan en lokafrestur hans gerði ráð fyrir. Bandarískir hermenn fara enn með stjórn Kabúl flugvallar en Talibanar hafa umkringt flugvöllinn og stillt vörðum sínum upp við leiðir að honum. 

Vestræn ríki og Alþjóðagjaldeyrissjóðurinn hafa tryggt að Talibanar hafi ekki aðgang að sjóðum ríkisins hjá þeim en Afganistan er mjög háð erlendri aðstoð þaðan sem 43 prósent af þjóðartekjunum koma.

Afganistan Joe Biden
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið