Missti stöðu sína til Jon Flanagan og er nú mættur til KA

Danski varnarmaðurinn Mark Gundelach hefur fengið félagaskipti til KA og gerir samning til haustsins en hann var án félags og verður því strax löglegur í Pepsi-Max deildinni.

Gundelach er 29 ára gamall hægri bakvörður sem var síðast á mála hjá danska B-deildarliðinu HB Köge.

Hann var fastamaður hjá liðinu í B-deildinni á síðustu leiktíð en fékk samningi sínum ekki endurnýjað þegar nýr þjálfari, sjálfur Daniel Agger, tók við stjórnartaumunum hjá HB Köge í sumar. Í hans stað leitaði Agger til fyrrum liðsfélaga síns frá Liverpool þar sem hægri bakvörðurinn Jon Flanagan leikur nú með HB Köge.

Gundelach þótti efnilegur leikmaður á sínum yngri árum en hann hefur leikið fyrir öll yngri landslið Danmerkur.

KA-menn hafa verið nokkuð stórtækir á leikmannamarkaðnum í sumarglugganum en félagið fyllti skarð Brynjars Inga Bjarnasonar með því að fá danska varnarmanninn Mikkel Qvist að láni frá Horsens. Á lokadegi félagaskiptagluggans í síðustu viku keypti KA svo Jakob Snæ Árnason frá nágrönnum sínum í Þór.

KA í 5.sæti Pepsi Max deildarinnar, sjö stigum á eftir toppliði Vals.