Dæmdur í 30 ára fangelsi fyrir að hafa myrt ættingja vegna ímyndaðs fjársjóðs

Hólmfríður Gísladóttir skrifar 8. júlí 2021 08:42

Caouissin er sagður hafa orðið óður vegna fjársjóðsins, sem virðist vera hugarburður.

Franskur maður sem myrti fjóra ættingja sína, þar af tvö börn, í leit að gullfjársjóði sem hann taldi þá hafa falið fyrir sér hefur verið dæmdur í 30 ára fangelsi.

Hubert Caouissin, 50 ára, játaði að hafa orðið mági sínum Pascal Troadec, 49 ára, og eiginkonu hans Brigitte, einnig 49 ára, að bana. Þá játaði hann einnig að hafa myrt börnin þeirra tvö; hinn 21 árs Sebastien og hina 18 ára Charlotte.

Caouissin var sannfærður um að Troadec og fjölskylda hans væru að fela gullstangir og -peninga; arf sem hann taldi hafa verið haldið frá eiginkonu sinni Lydie, systur Troadec.

Fram kom fyrir dómi að Caouissin taldi föður Lydie og Pascal hafa fundið fjársjóðinn í kjallara byggingar sem hann var að vinna að í borginni Brest árið 2006. Gullið væri partur af 50 kg fjársjóði sem franski seðlabankinn hefði falið fyrir nasistum á meðan hernáminu stóð.

Ekkert bendir til þess að fjársjóðurinn sé raunverulegur.

Caouissin hafði verið að njósna um Troadec-fjölskylduna þegar fjölskyldufaðirinn greip hann glóðvolgan við heimilið í febrúar 2017. Caouissin barði Troadec til bana og myrti síðan eiginkonu hans og börnin tvö. Börnin voru sofandi þegar Caouissin myrti þau.

Caouissin bútaði líkin í sundur, brenndi þau og gróf en lögregla gróf upp 379 líkamsparta á jörð morðingjans á Bretaníu. Eiginkona hans var dæmd í þriggja ára fangelsi fyrir að hafa aðstoðað mann sinn við að fela líkamsleifarnar.

Frakkland Erlend sakamál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.