Erlent

Vita ekki hvar hermaðurinn hættulegi er

Samúel Karl Ólason skrifar
Um 300 hermenn og 120 lögregluþjónar hafa komið að leitinni í Belgíu í dag.
Um 300 hermenn og 120 lögregluþjónar hafa komið að leitinni í Belgíu í dag. AP/Francisco Seco

Yfirvöld í Belgíu leita enn að hermanni sem stal miklu af vopnum úr herstöð og hvarf fyrir meira en viku síðan. Hermaðurinn hafði einnig hótað ráðamönnum og veirufræðingi sem hefur leitt viðbrögð yfirvalda í Belgíu við faraldri nýju kórónuveirunnar.

Lögreglan telur að hinn 46 ára gamli Jurgen Conings sé enn á lífi og er hans enn leitað.

Í dag var umfangsmikil leit gerð á skógi vöxnu svæði nærri landamærum Belgíu og Hollands, þar sem bíll hans fannst í síðustu viku. Þá fundust vopn í bílnum. Samkvæmt Brussel Times liggur ekki fyrir af hverju verið að leita aftur í skóginum en leit þar var hætt á laugardaginn síðasta og skógurinn opnaður aftur fyrir almenna borgara.

Í síðustu leit í skóginum fannst tjald sem talið var að Conings hefði notað. Það er nú dregið í efa og segjast rannsakendur í raun ekki vita fyrir víst hvort hermaðurinn hafi nokkurn tímann verið í skóginum, samkvæmt frétt Brussels Times.

Conings hefur verið í belgíska hernum frá 1992. Hann hefur viðamikla reynslu en hefur undanfarið ítrekað verið ávíttur fyrir rasisma og ofbeldisfulla hegðun.

Um þrjú hundruð hermenn og 120 lögregluþjónar hafa tekið þátt í leitinni í dag.

Het Lastste Nieuws segir öryggi hafa verið aukið á móttökustöðum flóttamanna, moskum og öðrum stöðum sem talið er mögulegt að Conings gæti gert árás á.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×