Ísraelsstjórn mótmælt víða um heim

Fleiri en tvö hundruð hafa nú farist í árásunum. Fjöldi Palestínumanna kom saman á Vesturbakkanum í morgun til þess að mótmæla Ísraelsher. Mótmælendur köstuðu steinum að þungvopnuðum ísraelskum hermönnum sem skutu táragasi til baka.

Mun víðar er mótmælt en á Vesturbakkanum einum. Allt frá Argentínu til Indónesíu hefur fólk safnast saman og krafist aðgerða gegn Ísrael. Til dæmis hér á Íslandi, á meðan utanríkisráðherrar Íslands og Bandaríkjanna funduðu í Hörpu.

Ákall leiðtoga heimsins um vopnahlé á svæðinu verður sífellt háværara. Hér á landi hefur á annan tug þingmanna úr stjórn og stjórnarandstöðu lagt fram þingsályktunartillögu um að Alþingi fordæmi loftárásir Ísraela og skori á Ísraelsstjórn að flytja landtökufólk og herlið af hernumdum svæðum.