Lífið

Óvissunni um Stockfish eytt

Stefán Árni Pálsson skrifar
Önnur mynd Andra og Anní.
Önnur mynd Andra og Anní.

Eftir töluverða óvissu er ljóst að hægt verður að standa fyrir kvikmyndahátíðinni Stockfish frá 20. maí til 30. maí í Bíó Paradís.

Þar verða 23 myndir sýndar sem allar hafa unnið til verðlauna.

Tvær kvikmyndir verða frumsýndar á hátíðinni og er þar um að ræða myndirnar Apausalypse og Little Kingdom.

Apausalypse er ný heimildarmynd eftir Anní Ólafsdóttur og Andra Snæ Magnason, höfunda Þriðja Pólsins sem var tilnefnd til fimm Edduverðlauna.

Apausalypse var tekin upp þegar heimurinn stöðvaðist fyrir ári síðan og frumsýning Þriðja Pólsins var frestað. Leikstjórarnir fóru ásamt Andra Haraldssyni kvikmyndatökumanni af stað til að fanga þessa einstöku tíma. Í myndinni eru tekin viðtöl við guðfræðinga, heimspekinga og listamenn.

Í Apausalypse eru viðmælendur spurðir: Hvað er í loftinu? Hvaða þýðingu hefur heimspásan í samhengi við andlega heilsu og stærstu vá samtímans, loftslagsbreytingar af mannavöldum?

Meðal þeirra sem koma fram eru Sigríður Þorgeirsdóttir heimspekingur, Elísabet Jökulsdóttir rithöfundur, Ingvar E. Sigurðsson leikari, Gunnar Kvaran sellóleikari, séra Auður Eir Vilhjálmsdóttir, Dóri DNA, Ragnar Axelsson ljósmyndari og Guðrún Eva Mínervudóttir rithöfundur.

Myndin verður frumsýnd á Stockfish þann 21. maí í Bíó Paradís. Sýningartími myndarinnar er 52 mínútur.

Little Kingdom er slavnesk/íslensk framleiðsla. Myndin gerist í þorpi í Slóvakíu í lok seinni heimsstyrjaldar. Þar er fylgst með Evu, ungri konu sem vinnur baki brotnu í einu verksmiðju þorpsins sem er stýrt af smákónginum Bar sem allir eiga sitt undir og kúgar jafnt starfsmenn sem og þorpsbúa.

Jack, ástmaður Evu, sinnir herskyldu en þegar honum berst bréf frá Evu um örlagaríkan viðburð í lífi þeirra ákveður hann að strjúka frá herdeildinni til að geta stutt ástina sína.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.