Erlent

Grunaður morðingi kaus Trump í nafni týndrar eigin­konu sinnar

Sylvía Hall skrifar
Barry Morphew kaus Donald Trump í forsetakosningunum vestanhafs fyrir hönd eiginkonu sinnar sem hann er grunaður um að hafa myrt.
Barry Morphew kaus Donald Trump í forsetakosningunum vestanhafs fyrir hönd eiginkonu sinnar sem hann er grunaður um að hafa myrt. AP

Maður sem grunaður er um aðild að hvarfi og mögulegu morði eiginkonu sinnar greiddi atkvæði í forsetakosningunum vestanhafs í nóvember í fyrra. Maðurinn, Barry Morphew, sagðist hafa viljað að Trump myndi vinna og hann vissi að eiginkona sín hefði kosið hann.

„Mig grunaði að allir hinir væru að svindla og ég vissi að hún var að fara að kjósa Trump,“ sagði Morphew um atkvæðið, en ekkert hefur spurst til eiginkonu hans Suzanne síðan í maí á síðasta ári. Þann 10. maí fór hún í hjólatúr í hverfinu þar sem hún bjó ásamt Morphew og dætrum þeirra, en lík hennar hefur aldrei fundist þrátt fyrir að hjólið og persónulegar eigur hennar hafi komið í leitirnar.

Morphew var handtekinn í byrjun mánaðar, tæplega ári eftir að eiginkona hans sást síðast. Hann hefur verið ákærður fyrir morð, eyðileggingu sönnunargagna og nú kosningasvik.

Atvikið var tilkynnt í október á síðasta ári, en Morphew greiddi póstatkvæði og mætti því ekki á kjörstað. Undirskrift Suzanne var ekki á kjörseðlinum en hann var skráður sem vitni. Þegar lögreglumenn spurðu hann út í atkvæðið og gerðu honum grein fyrir því að slíkt væri ólöglegt sagði Morphew: „Ég vissi ekki að þú mættir ekki gera þetta fyrir maka þinn.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.