Erlent

Vinur Gaetz ætlar að játa og starfa með saksóknurum

Samúel Karl Ólason skrifar
Þingmaðurinn Matt Gaetz er sagður til rannsóknar vegna vændiskaupa vinar síns, Joel Greenberg.
Þingmaðurinn Matt Gaetz er sagður til rannsóknar vegna vændiskaupa vinar síns, Joel Greenberg. AP/Phelen M. Ebenhack

Joel Greenberg, fyrrverandi embættismaður í Flórída og vinur þingmannsins umdeilda Matt Gaetz, hefur játað að hafa greitt sautján ára stúlku peninga fyrir að stunda kynlíf með öðrum mönnum. Hann ætlar sömuleiðis að vinna með saksóknurum Dómsmálaráðuneytis Bandaríkjanna.

Búist er við því að Greenberg muni viðurkenna sekt fyrir dómi á mánudaginn.

Gaetz er sagður til rannsóknar fyrir að hafa brotið mannsalslög með því að hafa stundað kynmök með þessari sömu stúlku. Hann hefur ekki verið ákærður en fjölmiðlar vestanhafs segja það til skoðunar.

Í dómsskjölum sem opinberuð voru í gær kemur fram að Greenberg ætli að starfa með saksóknurum og hafa þeir þar útvegað sér lykilvitni, verði Gaetz ákærður.

Greenberg nefnir Gaetz ekki á nafn í samkomulaginu sem hann náði við rannsakendur, samkvæmt frétt New York Times, þar segist hann þó hafa kynnt táninginn fyrir öðrum körlum og hún hafi sængað hjá þeim. Hann hafi jafnvel verið viðstaddur í einhverjum tilfellum.

Samkvæmt heimildum NYT hefur Greenberg þó sagt rannsakendum að Gaetz hafi sængað hjá stúlkunni og hafi vitað af því að hún hefði fengið greitt fyrir það. Þá kemur fram í áðurnefndum skjölum að saksóknarar telji sig búa yfir sönnunargögnum sem staðfesti frásögn Greenberg.

Greiddi mörgum konum fyrir kynlíf

Greenberg hefur einnig játað að hafa greitt mörgum öðrum konum fyrir kynlíf. Allt í allt hafi hann greitt meira en 70 þúsund dali fyrir um kynlíf í um 150 skipti. Hann játaði einnig aðra glæpi, eins og að hafa stolið úr opinberum sjóðum.

Daily Beast sagði frá því í síðasta mánuði að Greenberg hefði leitað til Rogers Stone, fyrrverandi ráðgjafa Donalds Trump, fyrrverandi forseta, og beðið hann um að aðstoða sig við að fá náðun frá Trump. Það kom fram í bréfi sem Greenberg sendi Stone í lok síðasta árs, eftir að Trump hafði mildað dóm sem Stone hlaut fyrir að ljúga að útsendurum Alríkislögreglu Bandaríkjanna.

Eins og áður segir hefur Gaetz verið bendlaður við kynlífskaupin og hafa greiðslur frá honum til Greenberg verið staðfestar. Þingmaðurinn segist þó aldrei hafa greitt fyrir kynlíf og segir að verið sé að snúa út úr gjafmildi hans í garð fyrrverandi kærasta.

Daily Beast birti í gær frétt þar sem haft er eftir vitnum að Gaetz hafi neytt kókaíns með vændiskonu í samkvæmi í kjölfar fjáröflunarsamkomu í Flórída árið 2019. Þá hefur miðillinn skjöl sem sýna að Greenberg greiddi hanni þúsundir dala árið 2017. Undir lok þess árs stofnaði hún ráðgjafafyrirtæki sem Greenberg notaði opinbert fé til að greiða henni 3.500 dali á mánuði fyrir að framleiða efni á samfélagsmiðla.

Fyrirtæki hinnar meintu vændiskonu fékk tvær slíkar greiðslur í janúar og apríl 2018. Endurskoðendur Seminole-sýslu vöktu í kjölfarið athygli á greiðslunum, auk annarra greiðsla frá sýslu í vasa Grennbergs.

Samkvæmt heimildum Daily Beast fundu endurskoðendur engar vísbendingar um að konan hefði veitt sýslunni nokkra þjónustu.


Tengdar fréttir

Hollusta við Trump borgar sig

Helstu stuðningsmenn Donalds Trump, fyrrverandi forseta Bandaríkjanna, á þingi vestanhafs hafa grætt töluvert á hollustu sinni við forsetann. Öll hafa þau safnað fúlgum fjár í kosningasjóði sína sem að mestu hafa borist í smáum skömmtum frá kjósendum Trumps.

Vinur Gaetz sagður vinna með yfirvöldum í rannsókn á mansali

Kjörinn fulltrúi í Flórída og félagi bandaríska fulltrúadeildarþingmannsins Matts Gaetz er sagður vinna með saksóknurum að rannsókn á meintu mansali þeirra beggja. Þeir Gaetz eru sakaðir um að hafa greitt ungum konum fyrir kynlíf.

Kanna hvort þingmaður hafi sýnt nektarmyndir í þingsal

Siðanefnd fulltrúadeildar Bandaríkjaþings kannar nú ásakanir um að Matt Gaetz, þingmaður Repúblikanaflokksins frá Flórída, hafi sýnt myndir af nöktum konum í þingsal, framið kynferðisbrot og neytt ólöglegra lyfja. Dómsmálaráðuneytið rannsakar einnig hvort að Gaetz hafi greitt fyrir kynlíf og stundað mansal.

Bandamaður Trump rannsakaður vegna mansals

Bandarískur fulltrúadeildarþingmaður og náinn bandamaður Donalds Trump, fyrrverandi Bandaríkjaforseta, er sagður til rannsóknar vegna mansals. Hann er sagður grunaður um að greitt undir sautján ára gamla stúlku sem hann hafi átt í kynferðislegu sambandi við.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.