Viðskipti innlent

Hagnaður Origo dregst saman

Eiður Þór Árnason skrifar
Stjórnendur félagsins eru sæmilega sáttir með niðurstöðuna.
Stjórnendur félagsins eru sæmilega sáttir með niðurstöðuna. Vísir/Vilhelm

Hagnaður Origo nam 163 milljónum króna á fyrsta ársfjórðungi og dróst saman um 61,6% frá sama tímabili í fyrra þegar hann nam 425 milljónum króna. Tekjur drógust saman um 2,4% milli fjórðunga og nam sala á vöru og þjónustu 4,2 milljörðum króna á fyrsta ársfjórðungi 2021.

Þetta kemur fram í árshlutauppgjöri Origo. Hagnaður fyrir fjármagnsliði, skatta og afskriftir (EBIDTA) var 301 milljón króna á fyrstu þremur mánuðum ársins og jókst frá fyrsta ársfjórðungi 2020 þegar hann nam 237 milljónum króna. Eiginfjárhlutfall er nú 58,6% en var 56,5% í lok árs 2020.

Samdráttur skýrist af lítilli innviðasölu

Jón Björnsson, forstjóri Origo segir í tilkynningu að fjórðungurinn hafi komið ágætlega út fyrir félagið.

„Samanburður við fyrra ár er vissulega erfiður sökum breytinga í efnahagslífinu, sem urðu á sama fjórðungi síðasta árs. Fjórðungurinn endar 2,4% undir veltu síðasta árs sem skýrist eingöngu af lítilli innviðasölu miðað við síðasta ár þegar fyrirtækið gekk frá stórum sölum til gagnavera. Tekjur annarra þátta eru hins vegar að vaxa.“

44% vöxtur var í sölu á hugbúnaði Origo og um var að ræða stærsta fjórðung í sögu dótturfélagsins Tempo. Viðverandi vöxtur er sagður vera á hugbúnaðarsviðum félagsins.

Vöruskortur á vélbúnaði hafði áhrif

„Í eigin hugbúnaði, sem er nokkuð vel skilgreindur í kringum heilbrigðismarkaðinn, mannauðslausnir, gæðakerfi og lausnir fyrir ferðaþjónustu, hefur gengið vel en um 44% aukning er í tekjum milli ára. 

Mesti vöxturinn er innan sprotahlutans, eða 68%, en þar eru sex mismunandi lausnir á nokkuð breiðu þroskastigi. Almennt séð var verkefnisstaða góð á 1F og vel hefur tekist til að við vinnu er tengist endurskipulagningu sölu- og markaðsstarfs og samhæfingar þátta er lúta að markaðsstarfi og hvernig við vinnum með okkar kjarnasvið,“ segir Jón í tilkynningu til Kauphallar.

Jón Björnsson, forstjóri Origo.Origo

„Sala og áherslur Origo í notendabúnaði heldur áfram jákvæðri vegferð á þessu ári. Notendabúnaður skilar 5% aukningu ofan á 38% aukningu s.l. ár þrátt fyrir töluverðar áskoranir á innkaupahliðinni, en verulegur vöruskortur hefur verið á vélbúnaði vegna skorts á örgjörvum í heiminum. 

[...] Fjárfesting Origo í afgreiðslutengdum lausnum er farin að hafa jákvæði áhrif á rekstur félagsins enda margar lausnir sem eru í mikilli eftirspurn þegar fyrirtæki leggja meiri áherslu á hagræðingu og stafrænt viðmót. Hér má nefna vörur eins og sjálfsafgreiðslukerfi, biðraðakerfi, skanna og rafræna hillumiða,“ bætir Jón við.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×