Innlent

Meta ár­legan kostnað við leg­hál­sýna­rann­sóknir 99 milljónir króna

Hólmfríður Gísladóttir skrifar
Vísir hefur undir höndum samskipti heilbrigðisráðuneytisins og Landspítala vegna leghálsskimana.
Vísir hefur undir höndum samskipti heilbrigðisráðuneytisins og Landspítala vegna leghálsskimana.

Landspítalinn metur árlegan kostnað við rannsóknir á leghálssýnum um 99 milljónir króna. Þetta kemur fram í kostnaðargreiningu sem spítalinn skilaði heilbrigðisráðuneytinu 15. mars síðastliðinn.

Kostnaðurinn miðast við 22 þúsund HPV greiningar og 8 þúsund frumuskoðanir á ári. Stofnkostnaðurinn er metinn í kringum 65 milljónir króna.

Samkvæmt greiningunni mun kostnaður við hverja HPV greiningu nema 2.356 krónum 8.287 krónur við hverja frumuskoðun.

Heilbrigðisráðuneytið sendi Landspítalanum fyrirspurn 2. mars síðastliðinn þar sem óskað var eftir staðfestingu Landspítala á því að hann gæti tekið við rannsóknum leghálssýna. 

Þá var óskað eftir upplýsingum um hvort húsnæði væri fyrir hendi og nauðsynlegur tækjabúnaður, mannafli sem tryggði samfellu í þjónustunni og hvort hægt væri að tryggja rannsóknarniðustöður innan þriggja vikna.

Ráðuneytið bað einnig um að hver liður væri kostnaðargreindur, að heildarkostnaður við yfirtöku verkefnisins væri tilgreindur og að fram kæmi hvenær spítalinn gæti tekið við verkefninu. 

Einnig var beðið um upplýsingar um hvaða gjald spítalinn myndi taka fyrir hvert sýni.

Ráðuneytið minnist ekkert á já-svarið frá því í nóvember

Í fyrirspurn ráðuneytisins var vísað til þess að í ágúst síðastliðnum hefði Landspítalinn „lýst því yfir“ að hann hygðist ekki sækjast eftir því að reka rannsóknarstofu til greiningar á leghálssýnum. Nýrra svara sé óskað „í ljósi breyttrar afstöðu Landspítala til verkefnisins“.

Ítrekað hefur verið fjallað um þann misskilning sem átti sér stað þegar umrædd samskipti fóru fram í ágúst en forsvarsmenn Landspítala hafa áréttað að þeir hafi ekki sóst sérstaklega eftir verkefninu þar sem þeir töldu það vera í höndum Krabbameinsfélagsins.

Ráðuneytinu mátti vera misskilningurinn ljós, því eins og spítalinn áréttar í svari sínu 15. mars var fyrirspurn forstjóra Heilsugæslunnar á höfuðborgarsvæðinu, sem var falið að taka yfir leghálsskimanirnar, svarað á þá leið í nóvember að spítalinn gæti jú tekið við rannsóknunum.

„Afstaða spítalans er því skýr og hefur ekki breyst,“ segir í svarinu frá 15. mars, sem er undirritað af Páli Matthíassyni, forstjóra Landspítalans.

Í svarinu kemur skýrt fram að spítalinn sé vel í stakk búinn til að taka við HPV rannsóknunum, enda nýbúinn að taka í notkun nýtt Cobas 8800 greiningartæki frá Roche, sem meðal annars er notið við skimun vegna Covid-19.

Tæki þrjá daga að fá svar við HPV rannsókn

Varðandi frumurannsóknirnar segir að um 50 fermetra þurfi til viðbótar við núverandi húsnæði meinafræðideildar og ýmsar lausnir nefndar í því samhengi. Þá er greint frá því að þær muni krefjast 2,7 stöðugildis til viðbótar, þar á meðan frumuskoðara í tvö stöðugildi.

„Til greina kemur að ráða lífeindafræðinga sem störfuðu við þessa þjónustu hjá KÍ, en jafnframt þarf að huga að mönnun til framtíðar, líkt og í öðrum heilbrigðisgreinum,“ segir í svarinu.

Um tækjabúnaðinn segir að nýr búnaður sé til staðar hjá Krabbameinsfélaginu og til greina kæmi að kaupa hann af félaginu. Gæðaeftirlit myndi felast í innra eftirliti, þar sem 10 prósent neikvæðra frumusýna yrðu endurskoðuð, og ytra eftirliti sem þyrfti að fara fram hjá erlendum aðila.

Varðandi svartíma segir í svarinu að frumurannsóknarstofa meinafræðideildar myndi sjá til þess að flestum sýnum yrði svarað innan þriggja vikna og að núverandi tækjakostur gerði það að verkum að svör við HPV greiningum gæti legið fyrir daginn eftir að sýni bærist.

Þar sem það borgaði sig hins vegar að rannsaka fleiri sýni í einu mætti gera ráð fyrir að svartími yrði að jafnaði þrír virkir dagar.

Spítalinn segist geta tekið við HPV rannsóknunum eftir um þrjár vikur og frumurannsóknunum í haust.

Samningurinn sem gerður var við Hvidovre um rannsóknir leghálssýna er með þriggja mánaða uppsagnarfresti.


Tengdar fréttir

Orð gegn orði og óljóst hve biðin er löng

Óskar Reykdalsson, forstjóri Heilsugæslu höfuðborgarsvæðisins, segir heilsugæsluna aldrei hafa fengið þau svör að rannsóknir á leghálssýnum væru útboðsskyldar. Þetta gengur þvert á fullyrðingar Kristjáns Oddssonar, verkefnastjóra Samhæfingarstöðvar krabbameinsskimana.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×