Golf

Tiger þakkaði þeim sem mættu fyrst á slysstað

Sindri Sverrisson skrifar
Tiger Woods kveðst þakklátur fyrir allar þær batakveðjur sem hann hafi fengið.
Tiger Woods kveðst þakklátur fyrir allar þær batakveðjur sem hann hafi fengið. Getty/Brian Rothmuller

Tiger Woods sendi frá sér yfirlýsingu í kjölfar þess að lögreglan í Los Angeles-sýslu greindi frá því að hraðakstur væri meginorsök bílslyssins sem hann slasaðist alvarlega í, 23. febrúar síðastliðinn.

Í yfirlýsingunni þakkar Tiger ýmsum þeim sem eiga sinn þátt í því að hann geti núna einbeitt sér að sinni endurhæfingu. Hann þakkar meðal annars þeim fyrstu sem komu á slysstað:

„Ég er svo þakklátur báðum þeim góðu og hjálpsömu manneskjum sem komu mér til aðstoðar og hringdu í neyðarlínuna,“ segir Tiger og þakkar einnig lögreglu og sjúkraflutningamönnum sem komu honum af slysstað undir læknishendur.

Tiger var á tvöföldum hámarkshraða þegar hann ók bifreið sinni út af veginum, eða 135-140 kílómetra hraða á klukkustund.

Aksturstölva bílsins sýndi að Woods snerti aldrei bremsuna áður en hann ók út af veginum. Lögreglustjórinn segir að það kunni að benda til þess að kylfingurinn hafi stigið á rangan fetil. Woods verður þó hvorki sektaður né kærður þar sem engin vitni urðu að óhappinu.

Tiger var skorinn upp vegna opins beinbrots á fótlegg. Hann slasaðist einnig á fæti og ökkla.

Kylfingurinn var útskrifaður af sjúkrahúsi fyrr í þessum mánuði. Óvissa ríkir um framtíð hans í golfíþróttinni en fyrir slysið höfðu þrálát bakmeiðsli gert honum erfitt fyrir.

Tiger Woods var um langt skeið besti kylfingur heims. Hann hefur unnið fimmtán risamót, það síðasta árið 2019. Aðeins Jack Nicklaus hefur sigrað á fleiri risamótum í golfi en hann sigraði á átján slíkum á ferlinum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.