Körfubolti

NBA dagsins: Klúðursleg lokasókn Bucks, ryskingar í Flórída og frábær Embiid

Sindri Sverrisson skrifar
Joel Embiid treður yfir Luke Kornet í sigrinum gegn Boston Celtics í nótt.
Joel Embiid treður yfir Luke Kornet í sigrinum gegn Boston Celtics í nótt. AP/Charles Krupa

Stephen Curry og Joel Embiid eru áberandi í NBA dagsins hér á Vísi. Við áflogum lá í Flórída þar sem tveir leikmenn voru reknir af velli í leik Toronto Raptors og LA Lakers.

Svipmyndir úr þremur leikja næturinnar, ásamt tíu allra bestu tilþrifunum, má sjá í myndskeiðinu hér að neðan.

Klippa: NBA dagsins 7. apríl

Curry skoraði magnaðar körfur og alls 41 stig fyrir Golden State Warriors sem tókst að vinna upp tíu stiga forskot Milwaukee Bucks á lokamínútunum og vinna 122-121 sigur. Bucks fóru afar illa með lokasókn sín en þeir fengu tæpar átta sekúndur til að tryggja sér sigurinn.

„Ég er mættur aftur,“ sagði Joel Embiid við Doc Rivers, þjálfara sinn hjá Philadelphia 76ers, eftir 106-96 sigurinn á Boston Celtics. „Ég tók eftir því,“ svaraði Rivers.

Embiid skoraði 35 stig en þetta var aðeins annar leikur hans eftir að hann hafði verið frá keppni í þrjár vikur vegna meiðsla í hné. Philadelphia er nú jafnt Brooklyn Nets í efsta sæti austurdeildar, með 35 sigra og 16 töp.

Það sauð upp úr í fyrsta leikhluta, í 110-101 sigri meistara LA Lakers á Toronto Raptors, eftir að Dennis Schröder braut á OG Anunoby. Montrezl Harrell mætti til að styðja Schröder, félaga sinn í Lakers, og á endanum voru þeir Harrell og Anunoby reknir af velli. 

Lakers, sem eru enn án LeBron James og Anthony Davis, unnu mikinn liðssigur þar sem sjö leikmenn skoruðu 10 stig eða fleiri. Talen Horton-Tucker var þeirra stigahæstur með 17 stig. Pascal Siakam var stigahæstur með 27 stig hjá Toronto en kanadíska liðið leikur heimaleiki sína í Tampa í Flórída vegna ferðatakmarkana af völdum kórónuveirufaraldursins.


NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.

NBA



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.