Erlent

McConnell varar við „sviðinni jörð“ í öldungadeildinni

Samúel Karl Ólason skrifar
Mitch McConnell, leiðtogi Repúblikana í öldungadeild Bandaríkjaþings.
Mitch McConnell, leiðtogi Repúblikana í öldungadeild Bandaríkjaþings. AP/J. Scott Applewhite

Mitch McConnell, leiðtogi Repúblikana í öldungadeild Bandaríkjaþings, varaði Demókrata í gær við því að Repúblikanar myndu skilja eftir sig sviðna jörð ef reglan um aukin meirihluta verði felld niður. Joe Biden, forseti, segist styðja að breyta reglunni til fyrra horfs.

Margir meðal Demókrata vilja fella regluna niður til að koma áherslumálum flokksins í gegnum öldungadeildina og til þess að reyna að stöðva tilraunir Repúblikana til að gera fólki erfiðara að kjósa.

Tveir öldungadeildarþingmenn Demókrataflokksins hafa þó lýst því yfir að þeir vilji ekki fella regluna niður, sama hvað. Hvor flokkur stýrir fimmtíu þingsætum deildarinnar og Kamala Harris, varaforseti, stjórnar úrslitatkvæðinu svokallaða.

Vegna reglunnar um aukinn meirihluta kemur þó sjaldan til þess að varaforseti þurfi að beita úrslitaatkvæði sínu.

Reglan segja til um að þörf sé á 60 atkvæðum af hundrað fyrir flest frumvörp en Á ensku kallast þessi regla „filibuster“. Hún felur í raun í sér að hvaða þingmaður sem er getur tafið störf þingsins, nema minnst 60 þingmenn greiði atkvæði gegn því.

Á árum áður þurftu þingmenn að standa í pontu og halda ræður til að stöðva störf þingsins en því var breytt á þá leið að þingmenn þyrftu bara að lýsa því yfir að þeir ætluðu að tefja störf þingsins og ekki standa í pontu.

Það þarf þó einungis 51 atkvæði til að fella regluna niður.

Joe Biden, forseti Bandaríkjanna.AP/Carolyn Kaster

Joe Biden, forseti, sagði í gær að hann væri stuðningsmaður þess að færa filubuster-regluna til fyrra horfs, á þann veg að þingmenn yrðu að halda langar ræður til að geta stöðvað störf þingsins.

Repúblikanar hafa þó varað við því að Demókratar hafi afskipti af reglunni. Það gerði McConnell aftur í gær og var hann ómyrkur í máli.

Eins og hundrað bíla árekstur

Í ræðu á þinginu í gær varaði McConnell samstarfsmenn sína við því að öldungadeildin yrði ekki starfhæf ef reglan yrði felld niður. Repúblikanar myndu beita öllum brögðum sem þeir gætu til að tefja störf deildarinnar og skilja eftir sig sviðna jörð.

„Svo ég sé skýr fyrir alla 99 samstarfsmenn mína: Enginn í þessari þingdeild getur einu sinni ímyndað sér hvernig öldungadeildin myndi líta út,“ sagði hann, samkvæmt AP fréttaveitunni. Hann bætti því við að þrátefli sem hefði einkennt deildina undanfarin ár, væri tittlingaskítur miðað við hvernig ástandið yrði.

McConnell sagði einnig að öldungadeildin yrði eins og hundrað bíla bílslys.

Hann varaði líka við því að næst þegar Repúblikanar ná völdum myndu þeir nota tækifærið til að koma á áherslumálum sínum. Nefndi hann í því samhengi að draga úr réttindum kvenna til þungunarrofs, draga úr áhrifum verkalýðsfélaga, gera innflytjendum erfiðara um vik að setjast að í Bandaríkjunum og að fella niður reglur varðandi byssueign.

Hér má sjá ræðu McConnell í heild sinni.

Margir Demókrata líta á það sem nauðsyn að fella niður regluna um aukin meirihluta. Það sé eina leiðin til að samþykkja lagafrumvarp til að verja rétt fólk til að kjósa, þar sem Repúblikanar í fjölmörgum ríkjum Bandaríkjanna hörðum höndum að því að gera fólki erfiðara að kjósa.

Frumvarp Demókrata hefur þegar verið samþykkt í fulltrúadeildinni. Þá hafa Repúblikanar á ríkisþingum Bandaríkjanna lagt fram fleiri en 250 frumvörp sem mörg hver byggja á ósannindum Donalds Trump, fyrrverandi forseta, og stuðningsmanna hans um að umfangsmikið kosningasvindl hafi kostað hann sigur í forsetakosningunum í nóvember.

Eins og fram kemur í frétt Politico felst málflutningur þeirra Demókrata sem vilja losna við regluna um aukin meirihluta í grunninn í sér að annað hvort geri Demókratar það og samþykki ný kosningalög, eða þeir sætti sig við að Repúblikanar geri svörtum og brúnum kjósendum, kjósendum sem komu Biden í Hvíta húsið, erfiðara að kjósa

Breytingar sem Repúblikanar vilja koma á feli margar hverjar í sér að erfiðara yrði fyrir þeldökkt fólk að kjósa eða kjördæmum yrði breytt með því markmiði að draga úr vægi atkvæða þeirra.

Demókratar felldu regluna niður tímabundið þegar Repúblikanar stóðu í vegi margra sem Baracks Obama hafði tilnefnt til fjölmargra opinberra embætta og Repúblikanar felldu niður regluna varðandi tilnefningu hæstaréttardómara í forsetatíð Trumps.


Tengdar fréttir

Rússar reyndu að hafa áhrif á bandamenn Trump

Vladímír Pútín Rússlandsforseti skipaði persónulega fyrir um tilraunir rússnesku leyniþjónustunnar til þess að koma höggi á Joe Biden í aðdraganda forsetakosninganna í Bandaríkjunum síðasta haust. Leyniþjónustan er meðal annars sögð hafa háð leynilega herferð til þess að hafa áhrif á nána bandamenn Donalds Trump, þáverandi forseta.

Biden til þjóðarinnar: „Ég þarfnast ykkar“

Joe Biden Bandaríkjaforseti hefur vakið mikla athygli fyrir ávarp til bandarísku þjóðarinnar í gær, þar sem umfjöllunarefnið var kórónuveirufaraldurinn. Keppast menn nú við að bera saman nýjan tón Biden við það stef sem hefur glumið síðustu ár.

1,9 billjóna að­­gerða­­pakki Bidens gerður að lögum

Joe Biden Bandaríkjaforseti skrifaði í dag undir lög um eina umfangsmestu efnahagsinnspýtingu í sögu Bandaríkjanna til að ráða niðurlögum kórónuveirufaraldursins og koma hjólum atvinnulífsins aftur á hreyfingu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×