Erlent

Fund­u fyrst­a smyglk­af­bát­inn fram­leidd­an í Evróp­u

Samúel Karl Ólason skrifar
Smyglkafbáturinn er að mestur úr trefjagleri og krossvið.
Smyglkafbáturinn er að mestur úr trefjagleri og krossvið. AP/Lögreglan á Spáni

Lögregluþjónar á Spáni lögðu nýverið hald á smyglkafbát sem verið var að smíða í vöruskemmu í borginni Málaga. Kafbátinn átti að nota til að smygla fíkniefnum og er þetta í fyrsta sinn sem vitað er að kafbátur sem þessi sé smíðaður í Evrópu.

Aðrir sambærilegir smyglkafbátar hafa allir verið framleiddir í Suður-Ameríku. Þeir marra yfirleitt í hálfu kafi, ekki ólíkt ísjökum, og eru notaðir til að flytja mikið magn fíkniefna frá Suður-Ameríku til Norður-Ameríku og Evrópu.

Í fréttatilkynningu frá Europol segir að lögreglan hafi við rannsókn málsins uppræt glæpasamtök skipuðum mönnum frá Spáni, Kólumbíu og Dóminíska lýðveldinu. Leiðtogi samtakanna var handtekinn á Spáni í nóvember í fyrra og toguðu lögregluþjónar í alla þræði honum tengdum.

Það endaði með umfangsmikilli aðgerð sem opinberuð var um helgina.

Húsleit var gerð á 47 stöðum á Spáni og 52 voru handteknir. Þá var hald lagt á rúmlega þrjú tonn af kókaíni, sjö hundruð kíló af hassi, hundrað þúsund evrur, kafbátinn og hraðbát. Þar að auki lagði lögreglan hald á um sex þúsund lítra af fíkniefnabasa

Lögreglan á Spáni stóð í samstarfi við Europol og lögreglu í Kólumbíu, Hollandi, Portúgal, Bretlandi og landamæraeftirlit Bandaríkjanna við rannsókn málsins.

Smyglkafbáturinn sem fannst var um tíu metra langur og gat borið allt að tvö tonn af fíkniefnum. Hann var smíðaður úr trefjagleri og krossvið og var með tveimur tvö hundruð hestafla vélum.

Samkvæmt Guardian telur lögreglan að glæpamennirnir hafi ætlað að sigla kafbátnum út á haf til að taka við fíkniefnum frá öðru skipi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×