Ásgeir Eiríksson bæjarstjóri í Vogum segir í samtali við Vísi að hann hafi ekki fundið fyrir neinum óróa. Engar drunur heyrist og jörð hafi varla skolfið frá því um hádegi í gær.
„Þetta hefur faktískt verið frekar rólegt, þannig að það er kannski bara lognið á undan storminum,“ segir Ásgeir.
Bæjarbúar séu algjörlega á fullu viðbragði og bíði fyrirmæla frá almannavörnum. Björgunarsveitir á svæðinu séu í viðbragðsstöðu og þjónustumiðstöð í Vogum tilbúin ef þörf er á.
„En þetta er auðvitað svo langt frá byggð, jafnvel þó að komi upp hraun,“ segir Ásgeir.
Landsnet býr nú starfsemi sína undir nokkrar sviðsmyndir ef til eldgoss kæmi á Reykjanesskaga.
Óróapúls hófst klukkan 14:20 suður af Keili við Litla-Hrút og mælist á flestum jarðskjálftamælum. Slík merki mælast í aðdraganda eldgosa en ekki hefur verið staðfest að eldgos sé hafið.
Almannavarnadeild ríkislögreglustjóra og Veðurstofa Íslands boða til blaðamannafundar klukkan 16 vegna mögulegs goss á Reykjanesi.
