Innlent

Í einu til­felli af fimm ekki hægt að úti­loka tengsl bólu­setningar og and­láts

Sunna Kristín Hilmarsdóttir skrifar
Alma Möller, landlæknir.
Alma Möller, landlæknir. Vísir/Vilhelm

Niðurstöður rannsóknar sérfræðinga embættis landlæknis á fimm andlátum sem tilkynnt voru til Lyfjastofnunar sem hugsanlegar alvarlegar aukaverkanir vegna bólusetningar gegn Covid-19 eru að í fjórum þessara tilfella sé ekki eða mjög ólíklega um orsakatengsl að ræða.

Í einu tilfelli sé hins vegar ekki hægt að útiloka tengsl með vissu þótt líklegra sé að undirliggjandi sjúkdómur hafi átt þátt í andlátinu.

Um var að ræða fjögur andlát og svo alvarleg veikindi í einu tilfelli sem leiddu til andláts. Umræddar tilkynningar bárust á tímabilinu frá því bólusetningar hófust í lok desember til 5. janúar.

Þetta kom fram í máli Ölmu Möller, landlæknis, á upplýsingafundi almannavarna og landlæknis í dag.

Rannsóknin var þríþætt og fólst í fyrrnefndri rannsókn sérfræðinga hjá landlækni. Þeir fóru ítarlega yfir sjúkraskrárgögn viðkomandi einstaklinga og rýndu grunnheilsufar til að leggja mat á hvort um hugsanleg orsakatengsl væri að ræða.

Þá var tölfræði dauðsfalla einnig könnuð og athugað hvort andlát væru fleiri en í venjulegu árferði. Í ljós kom að ekki væri um aukningu að ræða en Alma sagði að áfram yrði sérstaklega fylgst með þessari tölfræði.

Auk þessa sendu Lyfjastofnun og sóttvarnalæknir fyrirspurn til Norðurlandanna og víðar til að kanna hvort sambærilegar tilkynningar hefðu borist þar. Einstaka dauðsfall hafði verið tilkynnt en almennt eru andlátin talin tengjast undirliggjandi sjúkdómum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.