Innlent

Tvö þúsund leghálssýni óhreyfð í pappakössum vikum saman

Sunna Karen Sigurþórsdóttir skrifar
Vonast er til að samningar verði undirritaðir í næstu viku og að í framhaldinu verði hægt að senda sýnin til Danmerkur í greiningu. Sjálftökupróf munu verða í boði á næstu misserum. 
Vonast er til að samningar verði undirritaðir í næstu viku og að í framhaldinu verði hægt að senda sýnin til Danmerkur í greiningu. Sjálftökupróf munu verða í boði á næstu misserum.  Vísir/Egill

Tvö þúsund sýni úr leghálsskimunum fyrir krabbameini hafa legið vikum saman óhreyfð í pappakössum vegna skorts á samningum. Vonir standa til að hægt verði að senda sýnin í greiningu fljótlega í næstu viku.

Skimanir fyrir leghálskrabbameini færðust frá Krabbameinsfélaginu til heilsugæsla nú um áramót. Krabbameinsfélagið hætti að láta greina sýnin í nóvember og þegar skiptin urðu voru sýnin send í þessum pappakössum á heilsugæsluna í Hamraborg. Kassarnir innihalda ríflega tvö þúsund sýni.

„Því miður hafa ekki verið rannsökuð sýni frá því í nóvemberbyrjun og þau bíða rannsóknar,” segir Kristján Oddsson, svæðisstjóri og fagstjóri lækninga hjá heilsugæslunni í Hamraborg.

Ástæðan er að samningar hafa ekki verið undirritaðir við rannsóknarstofu í Danmörku sem mun halda utan um greiningu lífsýna úr leghálsskimunum, en ákveðið var að leita út fyrir landsteinana þegar ljóst var að Landspítala hefði ekki burði til þess að halda utan um greiningarnar. Samkomulag náðist við stofuna í dag og vonir standa til að samningar veði undirritaðir fljótlega í næstu viku.

„Við vorum bara á fundi áðan þar sem það eru 99 prósent líkur á að samningar takist,” segir hann.

Kristján segir tafirnar meðal annars skýrast af heimsfaraldrinum, en samkomulagið kveður meðal annars á um að konur geti óskað eftir svokölluðu sjálftökuprófi. Þá verða skimanir framvegis endurgjaldslausar. Biðtími eftir niðurstöðum muni einnig styttast.

Skimanir fyrir leghálskrabbameini og brjóstakrabbameini voru færðar frá Krabbameinsfélagi Íslands til heilsugæslu um áramót.Vísir/Egill

„Þetta hvað þetta er langur tími er í raun ekkert óvenjulegt hér á landi. Við höfum oft verið að bíða frá fjórum og upp í átta vikur eða jafnvel lengur eftir svörum undanfarna mánuði. Þannig að þegar þessir samningar eru í höfn og þetta er komið í þann farveg sem við viljum þá verða flestar konur búnar að fá svar innan við tíu vikum eftir að sýnið var tekið,” útskýrir Kristján.

Biðin ætti ekki að hafa áhrif.

„Hún getur haft það en ég tel að líkurnar séu afar litlar. Bara til að leggja áherslu á það, að þá eru tekin vefjasýni í kjölfar frumubreytinga og konur sem hafa greinst með sterkar breytingar í vefjasýnum bíða oft í tvo til þrjá mánuði jafnvel eftir að fara í aðgerð. Þannig að þessi bið hún ætti að hafa mjög, mjög lítil áhrif, vonandi.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.