Innlent

Segir að ráðist hafi verið á son sinn og honum svo vikið úr skólanum

Samúel Karl Ólason skrifar
Frá Borgarholtsskóla í gær.
Frá Borgarholtsskóla í gær. Vísir/Vilhelm

Móðir drengs sem ráðist var á í Borgarholtsskóla í gær segir að sonur sinn hafi sætt hótunum um mánaða skeið. Þær hafi byrjað eftir að hann stöðvaði árás annars drengs á unga stúlku. Hann hafi svo heyrt af því að til stæði að ráðast á sig með hnífi og kallað bróðir sinn til aðstoðar.

Bróðirinn hafi reynt að miðla málum en það hafi ekki gengið eftir og slagsmál hafi brotist út.

Inda Björk Alexandersdóttir, segir á Facebook að synir sínir hafi verið talsvert lemstraðir og með djúpa skurði á höfði. Drengirnir hafi ráðist á syni hennar með vopnum, hafnaboltakylfu og hnífum. Annar nemandi sé handleggsbrotinn eftir að hafa komið sonum hennar til aðstoðar.

Einn piltur var úrskurðaður í vikulangt gæsluvarðhald í dag og tveimur hefur verið sleppt vegna árásarinnar. Sex voru fluttir á slysadeild en enginn mun hafa særst alvarlega.

Sjá einnig: Einn í gæsluvarðhald vegna árásarinnar í Borgarholtsskóla en tveir lausir úr haldi

Í samtali við Vísi segir Inda að syni sínum, sem hafi verið fórnarlamb árásarinnar, hafi verið vikið tímabundið úr skólanum og að mál hans verði svo tekið fyrir þar. Henni hafi borist tölvupóstur um það um fimm leytið í dag.

„Það virðist vera sem að menn geti komið vopnaðir inn í skólann, lamið nemendur skólans blóðuga, og svo er þolendunum vikið úr skólanum ef hann ver sig. Ég skil ekki svona vinnubrögð,“ sagði hún.

Tilefni facebookfærslu Indu var að árétta að málið tengist ekki fíkniefnaskuld eða slíku á nokkurn hátt. Hún segir ummæli og vangaveltur um slíkt ekki réttar.

„Ég bið ykkur að róa ykkur í að dæma það sem þarna fór fram, þetta er svakalega erfitt. Ég bendi á að synir mínir voru ekki leiddir burtu frá hvorki skóla né bráðamóttöku í járnum, þeir eru með stöðu þolenda í þessu máli,“ skrifaði hún.

Mér þykir leitt að þurfa að setja inn þessa færslu hérna. Ég ætlaði ekki að tjá mig um þetta hér á fésbókinni en ...

Posted by Inda Björk Eyrbekk Alexandersdóttir on Thursday, 14 January 2021

Tengdar fréttir

Gaf sig fram við lögreglu eftir árásina í Borgarholtsskóla

Þrír hafa verið handteknir í tengslum við árásina í Borgarholtsskóla í gær. Piltarnir eru á aldrinum sextán til nítján ára. Eins þeirra var leitað í allan gærdag en hann gaf sig sjálfur fram við lögreglu seint í gærkvöld, samkvæmt heimildum fréttastofu. Sá er vistaður í fangaklefa og verður yfirheyrður í dag en þeir sem eru undir lögaldri hafa verið vistaðir á viðeigandi stofnun og mál þeirra unnið í samstarfi við barnaverndaryfirvöld, að sögn lögreglu. 

Lögregla raðar saman púslunum í Borgarholtsskóla

Að minnsta kosti sex manns hafa þurft að leita aðstoðar á slysadeild eftir að til átaka kom í Borgarholtsskóla í Grafarvogi í hádeginu í dag. Lögregla segir í tilkynningu að meiðsli þessara sex liggi ekki fyrir. Elín Agnes Kristínardóttir aðstoðaryfirlögregluþjónn staðfestir í samtali við Vísi að engin þeirra slösuðu séu í lífshættu eða alvarlega slasaðir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×