Lögregla var kölluð til eftir að maður í annarlegu ástandi hafði gert tilraun til þess að ræna fjármunum af öðrum manni í Kópavogi. Voru skæri notuð til þess að ógna viðkomandi, en hann náði að forða sér á hlaupum og hringja í lögreglu. Gerandi í málinu var handtekinn.

Þrír voru handteknir í Hafnarfirði vegna innbrots og þjófnaðar. Talsvert magn af þýfi fannst í fórum þeirra og var það haldlagt. Allir voru vistaðir í fangaklefum vegna málsins. Þá voru tveir handteknir og vistaðir í fangaklefum lögreglu í nótt eftir að hafa verið stöðvaðir á stolnum bíl í Kópavogi.

Árekstur var vegna hálku á Hafnarfjarðarvegi. Engin slys urðu á fólki, en skömmu síðar varð annað umferðaróhapp skammt frá þeim slysstað þar sem ökumaður missti stjórn á bifreið sinni og ók á vegrið. Sá slapp einnig ómeiddur en bifreiðin var óökufær eftir áreksturinn.

Nokkrar tilkynningar bárust lögreglu vegna flugelda víðs vegar um borgina, en lögregla var meðal annars kölluð til vegna elds í ruslagámi við Stýrimannaskólann. Er talið að flugeldur hafi verið notaður til þess að kveikja eldinn.

Alls voru átta ökumenn stöðvaðir vegna ölvunar eða fíkniefnaaksturs samkvæmt dagbók lögreglu.