Hefði Guðmundur átt að fórna leiknum í Portúgal eins og Norðmenn gerðu?

Þetta eru miklir óvissutímar í heiminum og þar sem kórónuveiran er í stórsókn í Evrópu þá eru flestir staðir betri til að vera á þessa dagana en flugvellir og flugvélar álfunnar.

Íslenska karlalandsliðið í handbolta flakkar samt sem áður fram og til baka um Evrópu í miðjum heimsfaraldri en það gera ekki allar þjóðir.

Á sama tíma einbeitir norska landsliðið sér bara að því undirbúa sig fyrir HM í handbolta sem hefst í Egyptalandi 13. janúar næstkomandi. Norðmenn áttu vissulega leiki í undankeppni EM eins og Ísland en þeir ákváðu að senda varaliðið sitt í þá leiki. Þjálfarateymið fór ekki einu sinni með.

Strákarnir okkar eru komnir til Portúgal þar sem þeir mæta heimamönnum í kvöld í undankeppni EM 2022. Þetta er fyrsti leikur þjóðanna af þremur í þremur löndum á næstu átta dögum. En hversu miklu máli skiptir þessi leikur?

Ísland er í fjögurra þjóða riðli þar sem tvö efstu liðin komast á EM og liðið í þriðja sæti gæti komist þangað líka.

Ísland byrjaði vel með sextán marka sigri á Litháen í nóvember (36-20) en leik liðsins á móti Ísrael var frestað. Portúgalar eru bæði búnir að vinna Ísrael (+9, 31-22) og Litháen (+8, 34-26) í fyrstu tveimur leikjum sínum. Ísland ætti að öllu eðlilegu að vinna leikina við Ísrael og Litháen og tryggja sér sæti á EM 2022.

Norðmenn töpuðu reyndar leiknum í Hvíta-Rússlandi með átta marka mun (33-25) og þeirra bíður annar erfiður leikur þegar Hvít-Rússar koma til Noregs á föstudagskvöldið. Norðmenn hafa unnið einn leik á móti Ítalíu í fimmtán marka mun og fjórða liðið í riðlinum en Lettland. Þeir líta svo á að sigrar á Ítalíu og Lettlandi ættu að tryggja sér EM-sætið og eru því tilbúnir að fórna leikjunum við Hvíta-Rússland.

Íslenski landsliðsþjálfarinn Guðmundur Guðmundsson er auðvitað mikill keppnismaður og það kom væntanlega ekki til greina að fórna leik sem þessum. Fyrir vikið þarf hann að hafa áhyggjur af mun fleiri hlutum en bara handbolta. Smithætta á ferðalaginu er til staðar og það væri hrikalegt að missa leikmann eða leikmenn út rétt fyrir HM.

Íslenska liðið þurfti samt líka æfingaleiki fyrir heimsmeistaramótið. Vandamálið er bara að liðið þarf nú að spila þrjá leiki í röð á móti Portúgal.

Einn möguleikinn hefði verið að senda varalið út til Portúgal en spila heimaleikinn síðan á aðalliðinu. Með því hefði íslenska liðið aðeins þurft að ferðast til Egyptalands eftir leikinn á sunnudaginn í stað þess að fljúga til Portúgals, aftur til Íslands og svo loks í langt ferðalag til Egyptalands.

Þetta hefði kannski verið raunhæfari möguleiki ef að Olís deild karla hefði ekki legið í dvala síðan í október. Hugsanlegt varalið úr deildinni hérna heima er því í engri leikæfingu og flestir frekar nýbyrjaðir að æfa aftur handbolta á fullu eftir langt hlé. Það hefði getað andað með vandræðalegu tapi út í Portúgal.

Brotthvarf Arons Pálmarssonar úr íslenska liðinu þýðir miklar áherslubreytingar og tækifæri fyrir aðra leikmenn að taka meiri ábyrgð. Þessir tveir leikir fram að fyrsta leik á heimsmeistaramótinu nýtast því til að spila breytt lið saman.

Nú er bara að vona að liðið sleppi við kórónuveiruna og meiðsli. Það er sennilega mikilvægara en sjálf úrslitin.