Sóldögg kemur fram á Bestu útihátíðinni

„Það verður löðrandi nostalgía á Bestu útihátíðinni í sumar." Þetta segir Bergsveinn Arilíusson, forsprakki hljómsveitarinnar Sóldögg en hún mun koma saman eftir langt hlé á hátíðinni í sumar.

Bergsveinn segir að meðlimir hljómsveitarinnar hafi verið snöggir að ákveða sig eftir að hafa rætt við aðstandendur Bestu útihátíðarinnar. „Okkur hefur ávallt liðið eins og Sóldögg hafi ekki sagt sitt síðasta — þarna er rétti vettvangurinn fyrir það."

Síðasta plata hljómsveitarinnar kom út árið 2002. Síðan þá hafa hljómsveitarmeðlimirnir flestir snúið sér að öðrum verkefnum en hafa þó öðru hverju komið saman. Þar á meðal hefur Sóldögg komið fram í Rúmeníu og Hollandi.

„Sóldögg var og mun ávallt vera tónleikahljómsveit, ekta útihátíðarband," segir Bergsveinn. Þá segir hann að Sóldögg muni heiðra þann hóp fólks sem ekki hafði aldur til að sækja tónleika hljómsveitarinnar á sínum tíma. „Þetta verður fyrir þá sem hlustuðu á plöturnar en fengu aldrei tækifæri til að koma á tónleikana okkar."

Besta útihátíðin verður haldin á Gaddstaðaflötum við Hellu, dagana 5. til 8 júlí. Er þetta í þriðja skipti sem hátíðin fer þar fram.

„Hátíðin í fyrra gekk vonum framar og við vonumst til að hún verði enn glæsilegri í ár," segir Haraldur Ási Lárusson, aðstandandi Bestu útihátíðarinnar. Undirbúningur fyrir hátíðina stendur nú sem hæst. Þá hefur verið ákveðið að bæta degi við hátíðina en samkvæmt Haraldi verður boðið upp á „létta stemningu" á þessum síðasta degi hátíðarinnar.

En Sóldögg er ekki eina hjómsveitin sem ætlar að rifja upp gamla takta á hátíðinni. „200.000 Naglbítar hafa staðfest komu sína í ár," segir Haraldur. „Þá höfum við staðfest þriðju hljómsveitina en flestir kannast við hana — við munum þó ekki opinbera þá hljómsveit strax."

Hægt er að sjá tónlistarmyndband við lagið Svört sól með Sóldögg hér fyrir ofan.