Tíu leikmenn Liverpool liðsins hafa aldrei tapað á Anfield

Liverpool er á góðri leið með að tryggja sér enska meistaratitilinn í fyrsta sinn síðan 1990 og getur náð nítján stiga forskot á toppi deildarinnar með sigri á West Ham í London í kvöld.

Liverpool liðið hefur unnið 22 af 23 deildarleikjum sínum á leiktíðinni og hefur ekki tapað í 40 deildarleikjum í röð.

Stemmningin á Anfield, heimavelli Liverpool, er engu lík og stuðningsmenn félagsins muna varla eftir síðasta tapleik liðsins á vellinum.

Það er kannski ekkert skrýtið því tíu leikmenn í leikmannahópi Liverpool í dag hafa aldrei tapað deildarleik á Anfield.

Liverpool lék sinn 50. deildarleik í röð án taps þegar liðið vann Úlfana í síðasta leik ársins en hefur síðan unnið báða leiki sína á Anfield, fyrst 2-0 sigur á Sheffield United og svo 2-0 sigur á Manchester United.

Síðasta deildartap Liverpool á Anfield kom á móti Crystal Palace 23. apríl 2017.

Sadio Mane er sá af þeim sem hefur spilað flesta leiki á Anfield án þess að tapa en þeir eru núna orðnir 59 talsins. Af þessum 59 leikjum Mane á Anfield hafa 50 þeirra unnist. Mane var leikmaður Liverpool í apríl 2017 en missti af leiknum á móti Crystal Palace vegna hnémeiðsla.

Mane missti líka af tapleik á móti Gylfa Þór Sigurðssyni og félögum í Swansea City í janúar þetta sama tímabil því hann var þá í landsliðsverkefni með Senegal.  Gylfi skoraði sigurmark Swansea í þeim leik sem er næstsíðasta deildartap Liverpool á Anfield.

Hinir taplausu leikmennirnir eru: Mohamed Salah (49 leikir), Andy Robertson (43 leikir), Virgil van Dijk (38 leikir), Alisson Becker (27 leikir), Alex Oxlade-Chamberlain (23 leikir), Fabinho (21 leikur), Naby Keita (15 leikir), Xherdan Shaqiri (15 leikir) og Adrian (6 leikir).

Næsti heimaleikur Liverpool í ensku úrvalsdeildinni er á móti Southampton um næstu helgi.