Eiður Smári: Messi góður vinur sem ég hitti oft

Eiður Smári Guðjohnsen var í áhugaverðu viðtali við norska blaðið Dagbladet í dag þar sem hann ræðir meðal annars um stærstu stjörnurnar sem hann hefur spilað með á löngum og glæsilegum ferli sínum.

Eiður Smári nefnir þrjá leikmenn - Lionel Messi, Ronaldinho og hinn „ekta“ Ronaldo [hinn brasilíska].

„Það var ótrúleg reynsla að spila með Ronaldo í PSV [í Hollandi] í fyrsta skiptið. Það var „vá-upplifun“. Það sama má segja um Ronaldinho hjá Barcelona,“ sagði Eiður Smári.

„En þeir voru liðsfélagar mínir. Ég var bara glaður að þeir voru í liðinu mínu. Mér fannst þetta eðlilegt.“

Sjá einnig: Eiður Smári: Man vel eftir þessu sögulega atviki

Danska fótboltagoðsögnin Preben Elkjær sagði í nýlegu viðtali að 99,9 prósent knattspyrnumanna í dag væru leiðinlegir.

„Ég veit ekki hver Lionel Messi er. Ég veit bara að hann er góður knattspyrnumaður en ég veit ekki hvernig hann er. Um hvað hugsar hann? Hvað líkur honum við? Hvað er honum illa við? Það veit enginn,“ sagði Elkjær í umræddu viðtali.

Eiður gefur ekki mikið fyrir þessu ummæli.

„Það þýðir ekkert að velta fyrir sér hvort að Messi sé svona og svona. Það er ýmislegt sagt en Messi sinnir sínum hlutum vel. Hann er rólegur og elskar bara fótbolta.“

„Hann er góður vinur sem ég hitti oft. Hann er afar indæll náungi sem ber virðingu fyrir liðsfélögum sínum og fær gagnkvæma virðingu.“

„Það var gríðarleg pressa á Messi og honum var ávallt spáð mikilli velgengni. Það var frábært að sjá hvernig hann þróaðist og þroskaðist sem leikmaður og hvernig honum tókst að standa undir væntingunum. Mér finnst mikið til þess koma.“

Eiður ræddi einnig um Brasilíumennina Ronaldo og Ronaldinho í viðtalinu, sem og Ole Gunnar Solskjær sem nú þjálfar hann hjá Molde. Og hann segir enn fremur að hann geti vel ímyndað sér að gerast þjálfari þegar leikmannaferlinum lýkur.

„Ég hef ekki ákveðið neitt og kannski verður nóg að fá eitthvað annað starf sem tengist knattspyrnunni. Ég þarf að finna það sem veitir mér mestu ánægjuna en það verður sjálfsagt aldrei í líkingu við það að spila knattspyrnu.“